APC rejista dezastre naturál neen iha Juñu nia laran
DILI, 09 Juñu 2025 (TATOLI)—Autoridade Protesaun Sivíl (APC, sigla portugés) liuhusi Gabinete Relasaun Esterna no Komunikasaun rejista dezastre naturál neen iha territóriu nasionál, hahú husi loron 02 to’o 09 Juñu 2025.
“APC kada semana sempre halo relatóriu ba dezastre naturál ne’ebé akontese iha territóriu Timor-Leste, nune’e rejistu tipu dezastre naturál iha territóriu hanesan anin-boot tolu, rai-halai tolu, uma hetan estragu tolu, ema mate ida no númeru ema afetadu neen,” Xefe Gabinete Relasaun Esterna no Komunikasaun, Nelson Nunes de Orleans, informa iha edifísiu APC, Kaikoli, Segunda ne’e.
Anin-boot akontese iha munisípiu Bobonaru, Vikeke no Oékusi, rai-halai akontese iha Vikeke, Bobonaru, Oékusi, no ema mout no lakon vida iha Baukau.
“Autoridade Protesaun Sivíl halo verifikasaun dadus númeru afetadu ba dezastre naturál hodi apoiu pakote emerjénsia no evakua bá fatin ne’ebé seguru,” Xefe Gabinete akresenta.
APC daudaun ne’e estabelese fatin evakuasaun tolu iha munisípiu Oékusi, Vikeke no Suai tanba munisípiu hirak ne’e mak baibain rejista númeru dezastre naturál boot liu munisípiu sira seluk.
“Ita sei halo meiu ida hodi ajuda vítima sira ne’ebé hetan dezastre naturál evakua bá viziñu sira-nia uma ne’ebé besik no seguru, hafoin dezastre ne’e normál mak vítima sira bele bá sira-nia fatin. Maibé ita mós ajuda kedas pakote emerjénsia ba sira,” nia katak.
APC serbisu hamutuk ho parseiru sira hanesan entidade Governu no sosiedade sivíl sira hodi rezolve impaktu dezastre naturál inklui atribui pakote emerjénsia ba vítima sira.
Jornalista : Alexandra da Costa
Editora : Julia Chatarina
