HNGV hala’o atividade haat atu selebra aniversáriu ba dala-22
DILI, 09 Juñu 2025 (TATOLI)—Hospital Nacional Guido Valadares (HNGV), hala’o atividade haat hanesan sertame, out reach, litúrjia no desportu hodi komemora aniversáriu HNGV ba dala-22 ne’ebé monu iha loron 29 Juñu tinan ne’e.
“Selebrasaun aniversáriu HNGV ne’e, ita sei halo atividade haat hodi komemora loron aniversáriu HNGV ba dala-22,” Diretór Klínika HNGV, Arcanjo de Jesus, ba jornalista sira, iha HNGV, Bidau, segunda ne’e.
Nia hateten avidadade sertame envolve pesoál saúde sira hanesan médiku, enfermeiru no parteira, nu’udár meiu ida atualiza liután siénsia médika.
“Ida-ne’e nu’udar atividade ne’ebé mak importtante duni katak pesoál saúde sira tenke prepara aan hodibele fó atendimentu másimu no iha koñesimentu ne’ebé di’ak iha área saúde,” Arcanjo esplika.
Responsavel ne’e afirma, maski selebrasaun loron aniversáriu HNGV ba dala-22 ona, maibé nafatin simu krítika sira-ne’ebé mak maihusi populasaun sira kona-ba espasu la sufisiente no servisu médiku sira-nian.
“Ami halo auto-reflesaun no buka dalan atu hadi’a liuhusi pilár haat hanesan funsionáriu, sistema, supply konsumavel no mediku, liuliu ita iha espesialista oinoin ne’ebé mak hala’o hela tratamentu saúde ba populasaun sira no nafatin simu keixa no mós simu konfortabilidade ne’ebé husi pasiente no família,” Arcanjo informa.
Jornalista: Felicidade Ximenes
Editór: Xisto Freitas da Piedade
