DILI, 09 Juñu 2025 (TATOLI)—Ministru Justisa, Sergio Hornai, hateten kandidatu majistradu sétimu kursu 2024 hamutuk na’in-24 ne’ebé tinan kotuk kontinua sira-nia formasaun komplementár iha Sentru Formasaun Jurídika Lisboa, Portugál, sei fila-hikas mai Timor-Leste (TL) iha loron 30 fulan-Juñu tinan ne’e tanba konklui ona formasaun durante tinan ida.
“Sira mai sei sujeita nafatin bá iha formasaun ne’ebé ita bolu dehan iha faze estájiu ninian,” Sergio hateten ba jornalista sira iha edifísiu MJ, Kolmera, segunda ne’e.
Goverante ne’e esplika, nia sei prezide reuniaun Konsellu Setór Justisa nian atu haree kona-ba Sentru Formasaun Jurídika Judisiária (SFJJ) nune’e sai kandidatu majistradu judisiáriu ne’ebé admitidu ba estájiu no halo mós formasaun iha SFJJ.
“Kandidatu majistradu sira-ne’e tuir formasaun komplememtár teoria tinan ida mak agora daudaun hala’o ona iha Portugál no besik atu konkluidu iha faze estájiu fulan neen. Hafoin estájiu fulan neen mak sira ba juíz karreira ho terseira klase, prokuradór karreira ho terseira klase, nune’e mós defensór públiku terseira klase.
Rekorda fali katak kandidatu majistradu hamutuk na’in-24 ne’e kompostu husi juíz na’in-13, kandidatu ba majistradu Ministériu Públiku na’in-hitu no kandidatu ba defensór na’in-haat. Kandidatu majistradu sira-ne’e tuir kursu majistradu judisiál sétimu kursu ba majistradu judisiál majistradu Ministériu Públiku no Defensór Públiku nian iha tinan 2023 no kontinua sira-nia kursu komplementár direitu iha Sentru Formasaun Jurídika Judisiária Lisboa, Dezembru 2024.
Jornalista: Natalino Costa
Editór: Xisto Freitas da Piedade
