DILI, 09 Juñu 2025 (TATOLI)—Prezidente Repúblika, José Ramos Horta, fó pose ba Marcos dos Reis da Costa nu’udar Embaixadór Estraordináriu no Plenipotentiáriu Repúblika Demokrátika Timor-Leste ba Reinu Kamboja, iha Palásiu Prezidensiál Nicolau Lobato, Bairru Pite, Dili.
Prezidente Repúblika, José Ramos Horta, afirma Timor-Leste no Kamboja iha paralelu istóriku–nasaun rua-ne’e sofre tinan barak husi violénsia no difikuldade sira,no nasaun rua ne’e ultrapasa ona adversidade boot hodi harii sosiedade pasífiku no demokrátiku. Istória komun ida-ne’e kria fundasaun úniku ba komprensaun no solidariedade entre ita-nia povu sira.
“Ha’u fiar katak nomeasaun Embaixadór Marcos da Costa nian sei eleva no hametin liután relasaun amizade no kooperasaun entre ita-nia nasaun rua,” Horta hateten liuhusi mota ne’ebé Agência Tatoli asesu, ohin.
Nomeasaun Embaixadór Marcos dos Reis da Costa reprezenta progresu signifikativu ida iha relasaun diplomátika entre nasaun rua-ne’e no reflete sira-nia kompromisu hamutuk ba kooperasaun rejionál no dezenvolvimentu iha kuadru ASEAN nian.
Nomeasaun ne’e reprezenta marka istóriku ida iha relasaun diplomátika entre Timor-Leste no Kamboja hafoin vizita ofisiál foin lalais ne’e husi Prezidente Senadu no Antigu-Primeiru-Ministru Kamboja nian, Samdech Akka Moha Sena Padei Techo Hun Sen, mai Timor-Leste, estabelesimentu Embaixada Kamboja nian iha Dili no aprezentasaun kredensiál husi Embaixadór Chun Sovannarith, subliña kresimentu parseria entre nasaun rua ne’e.
Embaixadór Marcos da Costa lori esperiénsia diplomátika distintu liu dékada rua ba nomeasaun istóriku ida-ne’e. Nia hola parte iha joven diplomata nain 50 dahuluk ne’ebé rekruta hodi estabelese ministériu Negósiu Estranjeiru Timor-Leste nian iha tinan 2000 no ofisialmente hahu iha independénsia tinan 2002.
Agora dadaun, nia hala’o kna’ar nu’udar Diretór Jerál ba Asuntu Bilaterál sira ba Ázia no Oseánia iha Ministériu Negósiu Estranjeiru no Kooperasaun hahú husi Agostu 2023. Durante nia karreira, nia servisu iha postu diplomátiku xave sira inklui Segundu Sekretáriu iha Malázia, Primeiru Sekretáriu iha Gabinete ONU nian iha Genebra no Konselleiru iha Jakarta.
Nia iha Mestradu Ezekutivu Relasaun Internasionál sira husi Eskola Diplomasia Genebra nian.
TATOLI
