DILI, 09 Juñu 2025 (TATOLI)-Sekretáriu Estadu ba Igualdade (SEI), Elvina Sousa Carvalho, konsidera reportajen mídia seidauk sensivel jéneru no dignifika feto. Tanba ne’e, formasaun sensivel jéneru no inkluzaun importante tebes ba jornalista sira.
“Importante tebes servisu parseria ho parte relevante hotu, oinsá fasilita formasaun ne’e ba mídia online sira atu halo reportajen ho sensivel”, SEI dehan iha salaun Maria Gorette, Matadouru, ohin.
Tuir nia reportajen mídia konaba sensivel jéneru importante tebes, tanba prevene violénsia bazea ba jéneru, la’ós de’it preokupasaun Timor nian maibé globál.
Nune’e, koñesimentu jornalista konaba asuntu referidu sei promove no prezerva igualdade no mós oinsá hamosu impaktu pozitivu hanesan respeitu malu, hodi muda ema nia hahalok violentu sira.
Membru governu ne’e dehan formasaun ne’e aliña ho kompromisu Timor-Leste nian iha planu asaun nasionál violénsia bazea ba jéneru faze datoluk ho durasaun tinan 10 (2022-2032), liuliu iha pilar 1 kona-ba prevensaun violénsia hasoru feto no labarik-feto, iha estratégia 2 ko’alia kona-ba muda komunidade sira-nia hahalok hodi prevene violénsia, ne’ebé mensiona papel mídia sira-nian atu haforsa mensajen pozitivu kona-ba relasaun saudável no fahe kbiit liuhusi rádiu, midia imprimi, no plataforma mídia sosiál ho intensivu liuhusi uza metódu kreativu hanesan kampaña online, animasaun, talkshow hodi hatudu ezemplu norma sosiál ne’ebé pozitivu no suporta igualdade.
“Formasaun ne’e importante tebes tanba kuandu sai ona vítima no sobrevivente, nia mós presiza protesaun no presiza informasaun ne’ebé sensivel, no oinsá enkoraja ema seluk atu hato’o keixa ba krime ne’ebé akontese ba sira”, nia afirma.
Xefe Ekipa programa Nabilan husi The Asia Foundation (TAF), Xylia Ingham, dehan papél mídia importante tanba liuhusi mídia maka ema hatene saida mak jéneru no inkluzaun.
“Ita mai iha-ne’e hodi fahe informasaun kona-ba jéneru no inkluzaun ba jornalista atu oinsá mak bele sensivel. Bele dehan di’ak ona tanba ita haree mídia bainhira públika sai notísia la-dehan feto maka sala. Espera, liuhosi formasaun ne’e bele hasa’e koñesimentu no komprende oinsá fó sai reportajen ne’ebé pozitivu kona-ba feto sira-ne’ebé esperiénsia violénsia”, nia dehan.
Prezidente Konsellu Imprensa (KI), Otelio Ote, husu ba jornalista sira atu tau atensaun ba asuntu ida-ne’e tanba importante ba jornalista sira iha terenu.
Formasaun ne’e akontese ohin to’o sesta semana ne’e, ho formadór husi TAF-Nabilan, KI, Sekretariu Estadu Komunikasaun Sosiál (SEKOMS) no Polísia Sientífika Investigasaun Kriminál (PCIC, sigla portugés).
Notísia relevante: SEII enkoraja mídia nasionál halo kobertura ba asuntu sensível jéneru
Jornalista : Osória Marques
Editora : Rita Almeida
