Autoridade Baukau submete proposta reabilitasaun fatin turizmu ba nasionál
BAUKAU, 10 Juñu 2025 (TATOLI)—Autoridade Baukau liuhosi Diresaun Turizmu no Ambiente relata proposta kona-ba planu reabilitasaun fatin turizmu relijiozu Ariana iha Postu Venilale no Liria iha Suku Kaibada, Postu Baukau Vila, ba Ministériu Turizmu no Ambiente (MTA).
“Ita relata tiha ona ba Nasionál. Hein de’it planu estimasaun ba orsamentu no hein ekipa mai-fali haree fatin ne’e,” Diretór Turizmu no Ambiente, Carlito Pereira hateten iha Vila Nova, Baukau, tersa ne’e.
Nia salienta, Governu presiza fó atensaun hodi reabilita tanba atrai vizitante hanesan komunidade lokál, nasionál inklui internasionál. Atualmente, sítiu turístiku menus fasilidade komplementár sira hanesan saneamentu.
“Bainhira vizitante sira bá mak saneamentu laiha, sira bá dala ida de’it lakohi bá tan ona,” Carlito informa.
Carlito argumenta, bainhira fatin turizmu reabilitadu ona, husi Governu sei fó reseita nune’e autoridade munisipál sei jere hodi halo manutensaun ba fasilidade sira-ne’ebé eziste no sei kontrola liuhosi estabelese regra no regulamentu sira iha lokál turizmu.
Jornalista: Natalino Belo
Editór: Xisto Freitas da Piedade
