DILI, 10 Juñu 2025 (TATOLI)—Ekipa konjunta kompostu Komisaun Antí Korrupsaun (CAC-sigla portugeza) no Departamentu Investigasaun Kriminál, tersa ne’e, foti obrigatóriu atuál Prezidente Autoridade Munisípiu (PAM) Aileu, Joao Bosco dos Santos, hodi submete ba prosesu identifikasaun iha edifisiu CAC, Faról, tanba suspeita ba kazu ezekusaun osan Estadu la tuir regra orsamentál ba projetu sira-ne’ebé halo iha Munisípiu Aileu husi tinan 2024 to’o 2025.
Ekipa konjunta dezloka direta ba edifisiu Prezidente Autoridade Munisípiu Aileu ne’e, iha tuku 09:00 Otl. Iha prosesu ne’e, CAC hatudu uluk mandadu husi Tribunál tuir lei haruka.
Tuir informasaun ne’ebé TATOLI rekolla katak PAM Aileu ne’e hakfodak bainhira CAC to’o iha nia fatin, maibé depoizde ekipa CAC esplika tiha razaun prezensa iha-ne’ebá, to’o ikus nia koopera no akompañadu husi nia funsionáriu balun dezloka mai edifisiu CAC.
Diretór Jerál Investigasaun CAC, José Verdial, esplika CAC halo identifikasaun bazeia ba Kódigu Prosesu Penál artigu 53 ne’ebé hateten kuandu suspeita ema ruma entaun CAC nu’udár Órgaun Polísia Kriminál Espesializada tenke halo identifikasaun ba ema ne’ebé suspeitadu.
Nia haktuir, CAC halo identifikasaun ba PAM Aileu tanba bazeia ba keixa husi komunidade no bazeia ba informaaun ne’ebé CAC rekolla rasik liga ho iha ezekusaun orsamentu la’o la tuir ninia regra ne’ebé eziste no fó filafali benefísiu ba aan rasik no parte balun.
José informa, CAC seidauk bele pronúnsia buat ruma atu detein ka la detein ema-boot ne’e tanba tuir Kódigu Prosesu Penál artigu 53 ne’e dehan halo identifikasaun de’it.
“Prosesu identifikasaun sei la’o hela. Seidauk terminadu. Entaun, ha’u seidauk adiatan ba ita-boot sira kona-ba kontinuasaun oinsá. Más, ita-nia lei klaru, kuandu iha identifikasaun ita komprova duni informasaun ne’ebé mak CAC simu, ita prepara kedas auto-notísia haruka bá Ministériu Públiku,” nia esklarese.
Verdial hatutan, tuir Kódigu Prosesu Penál, CAC iha tempu atu halo identifikasaun ba sidadaun ida iha oras 12 nia laran, katak atu prova iha ka lae ne’e tenke liberta fali ema ne’e no enkamiña kedas autus ba Ministériu Públiku.
Nia tenik, CAC sei halo tan identifikasaun ba ema balun ne’ebé nu’udár interveniente ba prosesu ne’e.
Jornalista: Natalino Costa
Editór: Xisto Freitas da Piedade
