DILI, 10 Juñu 2025 (TATOLI) – Governu haruka ona dekretu-lei ida kona-ba kriasaun no estatutu Empreza Públika Cabos de Timor-Leste (CTL, E.P), ne’ebé sei jere kabu fibra optika.
Tanba ne’e, Ministru Transporte no Komunikasaun, Miguel Manetelu, hateten Governu hein hela dekretu-lei promulgasaun hosi Prezidente Repúblika (PR), José Ramos Horta, ba dekretu-lei referidu.
Lembra katak Konsellu Ministru aprova, iha 09 Abríl, dekretu-lei kona-ba kriasaun CTL, E.P, ho nia estatutu hodi jere kabu submarinu fibra ótika iha Cable Leading Station (CSL) Bebonuk.
“Ita hein katak tempu badak bele publika iha Jornál Republika. Kuandu publika tiha dekretu-lei ne’e, komisaun instaladora ba empreza ne’e sei hahú serbisu para prepara nomeasaun ba ema sira ne’ebé atu jere ita-nia kabu fibra óptika ne’e”, Miguel Manetelu hateten iha Palásiu Governu, ohin.
Nune’e mós Governu halo hela prosesu atu haree gateway ida iha CLS iha Bebonuk. Tanba kontentór ida ne’ebé daudaun monta iha Bebonuk ne’e simu ligasaun husi VOCUS. “Maibé, atu sai mai ba ita atu uza fali ne’e presiza gateway ida iha ne’ebá atu asegura. Ha’u espera katak tinan ida-ne’e, kona-ba kabu fibra ótika nia tenke rede full service, signifika katak ita uza”, dehan.
Notísi relevante: Kriasaun CTL, E.P sei jere kabu submarinu fibra ótika
Jornalista: Arminda Fonseca
Editora: Maria Auxiliadora
