OEKUSI, 10 Juñu 2025 (TATOLI) – Komandante Komponente Navál FALINTIL-Forsa Defeza Timor-Leste (F-FDTL), Komodoro Higino Das Neves, informa komandu sei halo investigasaun kle’an kona-ba motivu membru F-FDTL, Reinaldo Ximenes, mate iha postu komponente Navál Rejiaun Administrativa Espesiál Oekusi Ambeno (RAEOA).
Notísia relevante: Breaking News: Membru F-FDTL ida mate ho mistériu iha Oekusi
“Akontesimentu ne’e mós derrepente de’it, foin daudaun nia (matebian) nia-oan moras uitoan, komandante postu autoriza nia ba vizita família sira iha uma, iha semana rua liuba, nia (Mateabin) foin mak fila-fali mai, agora sira iha ne’e, problema iha mós ha’u seidauk hatene, orsida ha’u sei husu sira atu ko’alia mai, mak ita foin hatene tanba saida mak akontese hanesan ne’e,” dehan Comodoro ba jornalista sira, hafoin observa direta isin mate iha postu navál Oekusi, ohin.
“Maibé ohin ha’u rona dehan nia hanesan triste ne’e iha, tan ne’e mak ohin ha’u hasoru sira, atu ko’alia nia triste ne’e oinsá, investiga sira, ko’alia uitoan kona-ba ninia fen, dehan matebian hamriik la’o daudaun, ita lahatene nia problema ne’e saida,” Komodoro ne’e afirma.
Komodoro Higinio Neves, esplika nia-kronolojia katak tuir loloos, serimónia, ohin ne’e, Komponente Navál iha Oekusi atu entrega ofisiál rai ne’ebé, uluk fujineiru sira foufoun mai Oekusi iha 2012, atu entrega filafali ba Estadu liuhusi Autoridade RAEOA, no Ministériu Justisa (MJ), tanba fatin ne’e fatin estratéjiku, bele lori bote mai iha ne’e, tanba antes ne’e iha postu tuan, atu tau bote difisiál.
“Tan ne’e mak ami hili fatin ne’e, depois ha’u mai haree oinsá mak bele tau lar iha ne’e, nune’e sira bele halo ona sira-nia misaun ka servisu,”.
“Agora derrepente ami hotu iha leten, ekipa ida halo guarda onra mai ha’u ne’e, sira fila mai sei iha dalan,membru ne’e mate ona, tiru-aan nonok iha nia kuartu. Kuartu ne’ebé Ofisiál Sarjentu sira toba ne’e, nia mak tiru-aan iha ne’ebá, ne’e ema hotu la hatene, só sira na’in-rua ne’ebé halo reparasaun iha ne’e mak rona kilat tarutu, depois informa mai, ba haree mate ona, entaun situasaun mak ne’e, ita seidauk hatene motivu,” nia klarifika.
Hafoin observa, Komandu Navál koordena kedas ba Polísia Nasionál Timor-Leste (PNTL) halo kedas investigasaun no parte saúde fó asisténsia atu haree kronolojia no kondisaun.
Biografia badak
Matebian Membru F-FDTL, Reinaldo Ximenes husi Laga, Munisipíu Baucau, ne’ebé envolve iha vida militár iha tinan 2021, no mate husik hela nia feen-kaben no oan ida, daudaun ne’e hela iha postu administrativu Laga.
Tuir observasaun jornalista Ajénsia Tatoli,I.P, katak matebian oras ne’e sei iha hela postu komponente Navál, iha bairru Oébau, suku Costa sub-rejiaun Pante Makasar no tuir planu sei transporta ba Dili, ohin.
Jornalista: Abílio Elo Nini
Editór: Florencio Miranda Ximenes
