Konflitu entre estudante iha espasu públiku hanesan problema individuál
DILI, 10 Juñu 2025 (TATOLI)—Diretór Eskola Ensinu Sekundáriu Jerál (ESJ) Finantil, Aniceto Berlelo, hateten, problema ne’ebé baibain akontese entre estudante ho estudante iha espasu públiku ne’e problema individuál tanba eskola la hanoris estudante atu sai kriminozu.
“Eskola mak hanesan uma-mahon ida ba ema hotu hodi hamahan-an buka matenek, eskola simu ema la haree ba otas, maski ema barak mak bá vizita de’it to’o eskola hotu fila ona maibé nia sai hanesan uma-k’nua no dalan ba futuru. Signifika fatin ne’e atu apreende la’os sai fatin atu hakiak kriminozu tanba fatin ne’e mak ema hotu sai susesu,” Diretór Eskola informa iha edifísiu Eskola, Ai-mutin, Tersa ne’e.
Notísia relevante : HADEZTA organiza formasaun rezolusaun konflitu ba estudante Eskola ESJ Finantil
Nia dehan, profesór sira la’os atu hanorin estudante sira hodi tuda malu no bainhira estudante ne’ebé uza farda halo problema iha li’ur, sira sei hasoru diretamente ho membru Polísia Nasionál Timor-Leste (PNTL).
“Ami kontrola estudante sira ho másimu, ne’ebé ami seidauk define estudante sira-nia motivu envolve iha konflitu,” nia akresenta.
Biban ne’e, Diretór husu ba públiku atu labele entrepreta situasaun, katak eskola problemátiku tanba estudante sira hanesan adolesente, sira-nia tempu atu nakar, ne’e normál tanba sira sei buka sira-nia karakter loloos.
“Profesór hanorin sira atu sai matenek, la’os ba tuda malu, sona malu, baku malu, sira-ne’e konsidera sosiedade ona bainhira sai husi resintu eskola no daudaun ne’e ami mós kria livru matadalan ba estudante sira hodi la’o tuir regra,” nia tenik.
Eskola ESJ Finantil daunsaun ne’e iha estudante ativu 1.350 no profesór ne’ebé hanorin iha eskola inklui administrasaun no seguransa hamutuk 70.
Jornalista : Alexandra da Costa
Editora : Julia Chatarina
