DILI, 10 Juñu 2025 (TATOLI)—Ministru Komérsiu no Indústria, Filipus Nino Pereira, hateten Ministériu Komérsiu no Indústria (MCI-sigla portugeza) hamutuk ho liña ministeriál sira esforsu atu aliña nesesidade sira bainhira tama Nasaun Sudeste Aziátiku (ASEAN-sigla ingleza).
“Ita-nia preparasaun sira-ne’e ha’u hanoin durante ne’e iha konsultasaun nia laran. Husi ne’ebá partisipasaun lubuk ida-ne’ebé mak iha ASEAN inklui partisipasaun téknika sira-ne’ebé mak ita atravesa husi Ministériu Negosiu Estranjeiru no Kooperasaun, ne’ebé mak halo hela esforsu no mós esforsu lubuk ida-ne’ebé mak maihusi liña ministeriál,” Nino Pereira dehan ba TATOLI iha Hotel Timor, tersa ne’e.
Notísia relevante: TL entrega ona oferta merkadu ba nasaun membru iha simeira ASEAN
Nia informa, dokumentu ka akordu tratadu ida-ne’e mós importante atu fasilita di’ak liután hodi tama ba ASEAN.
“Prosesu ida-ne’e ita finaliza ona dokumentu 66 inklui aspetu ekonomia, sosiál, kulturál no mós buat balun ne’ebé liga ba infraestutura. La signifika buat sira-ne’e 100% mak tama lae, maibé fazeadamente,” Nino esplika.
Tanba ne’e, nia dehan, iha negosiasaun tenke halo hamutuk iha meza ida ko’alia ba interese ne’e, tanba durante ne’e dokumentu hotu-hotu aprezenta iha Konsellu Ministru hanesan produtu lei sira no prosesu lei sira.
“Ha’u hanoin Primeiru-Ministru nia mensajen klaru tebes katak ita-nia prontidaun atu adere ba ASEAN parte importante ida ba mundu globál no ita mós iha organizasaun ida-ne’ebé mak hetan rekoñesimentu internasionál,” nia konklui.
Jornalista: Felicidade Ximenes
Editór: Xisto Freitas da Piedade
