Parlamentu autoriza vizita Prezidente Repúblika bá Mónaku
DILI, 10 Juñu 2025 (TATOLI) – Parlamentu Nasionál (PN), liuhusi reuniaun plenária aprova ona pedidu dezlokasaun Prezidente Repúblika, José Ramos Horta, bá Mónaku, entre 21 no 26 Juñu 2025.
Pedidu dezlokasaun referidu hetan aprovasaun tanba relasiona ho konvite husi Majestadu Liurai-Mane Albert II Mónaku.
“Autorizasaun ne’e konsede ho votu a favor 40, kontra 9, no abstensaun 0. Nune’e, pedidu Prezidente Repúblika nian pasa”, Prezidente Parlamentu Nasional, Maria Fernanda Lay, fo sai durante sesaun plenária.
Tuir testu Prezidénsía ne’ebé lee sai husi Sekretária Meza, Virgínia Ana Belo, termu previstu husi númeru 1 iha artigu 80 no alínea h númeru 3, artigu 95 iha Konstituisaun, ho meiu ne’e Prezidente Repúblika solisita ba PN konsentimentu préviu dezlokasaun ofisiál bá Mónaku, ho objetivu atu partisipa selebrasaun 20 Aniversáriu Foundation for Post Conflict Development (FPCD) no désimu aniversáriu Kriasaun FPDC.
Dokumentu ne’e mós haktuir, durante vizita ofisiál ida-ne’e, atividade ne’ebé sei hala’o iha ne’ebá mak enkontru ida ho Majestade Liurai-mane Alberto II, ho almosu ofisiál, enkontru ho juventude, empreza sira no seluk tan.
Notísia relevante: PN aprova pedidu PR Horta hala’o viajen ofisiál bá Singapura
Jornalista: Arminda Fonseca
Editora: Maria Auxiliadora
