SEDL avalia kondisaun ezistente Munisípiu Baukau
BAUKAU, 10 Juñu 2025 (TATOLI)—Sekretáriu Estadu Dezenvolvimentu Lokál (SEDL) liuhosi ekipa Diresaun Promosaun Efisiénsia Administrasaun Lokál (DPEAL) sei avalia kondisaun ezistente iha administrasaun munisipál to’o postu durante semana-ida.
Sekretáriu Estadu Dezenvolvimentu Lokál, Mateus dos Santos Tallo, esplika prezensa ekipa iha Baukau atu avalia kondisaun ezistente bazeia ba polítika Governu liuhosi SEDL hanesan implementa ona liuhusi pose ba kargu xefia sira iha nivel munisípiu husi prezidente autoridade to’o administradór postu sira iha.
“Ha’u hanoin tempu ona avalia kondisaun mínima. Sei avalia fali serbisu sira iha administrasaun lokál nian,” Sekretáriu Estadu Dezenvolvimentu Lokál hateten iha Sentru Konvensaun Baukau (CCB-sigla portugeza), segunda ne’e.
Governante ne’e salienta avaliasaun kondisaun ezistente nu’udár pasu dahuluk hodi avalia serbisu administrasaun lokál molok avalia kondisaun mínima iha tempu badak tuir polítika Governu sentrál.
Objetivu prinsipál husi avalia kondisaun ezistente mak atu konkretiza servisu administrasaun públika sira liuliu administrasaun lokál iha nivel munisípiu to’o postu administrativu sira, nune’e atu hatene funsionamentu serbisu hodi sukat ba planu asaun anuál no instalasaun podér lokál.
Aleinde ne’e, ho avaliasaun referida atu sukat forsa serbisu iha administrasaun públika hanesan atendimentu ba komunidade iha prosesu dezenvolvimentu nivel munisípiu, baziea ba kompromisu Governu ba implementasaun polítika podér lokál.
“Governu esforsu hela desentralizasaun podér lokál hanesan programa importante ida ne’ebé tenke implementa mandatu Governu ida-ne’e,” Mateus akresenta.
Ekipa DPEAL sei avalia kondisaun ezistente iha Munisípiu Baukau husi 08-12 Juñu antes kontinua ba Munisípiu Lautein no tuir planu sei termina iha Munisípiu Dili.
Entretantu, iha loron dahuluk ba avaliasaun kondisaun ezistente, hetan partisipasaun másimu husi kargu diretór serbisu munisipál husi liña ministeriál sira no autoridade postu administrativu ualu iha Munisípiu Baukau.
Jornalista: Natalino Belo
Editór: Xisto Freitas da Piedade
