DILI, 10 Juñu 2025 (TATOLI)-Diretór Jerál Sekretariadu Tékniku Administrasaun Eleitorál (STAE), Elviro Fernandes, apela ba sidadaun ne’ebé seidauk foti kartaun eleitorál, hakbesik-an ba edifísiu STAE nasionál no munisípiu atu foti eleitorál atualizadu.
“Ba eleitór ne’ebé atualiza iha STAE munisípiu tenke foti iha munisípiu, hirak ne’ebé atualiza iha nasionál foti iha Nasionál. Bainhira atu ba foti ita-boot sira-nia kartaun eleitorál foun, presiza aprezenta resivu no kartaun eleitorál tuan”, dehan ba TATOLI iha nia knaar fatin Kaikoli, tersa ne’e.
Alende ne’e STAE nasionál no munisípiu sei nafatin prosesa no atribui kartaun eleitorál foun ba eleitór sira ne’ebé atualiza ona husi data 25 Abril to’o inísiu fulan-Juñu.
“STAE hahú halo distribuisaun blanku kartaun eleitorál no ribbon ba STAE munisípiu 12, inklui Oekusi no Ataúru hahú iha loron 02 Juñu 2025. Nune’e mós hahú imprime no atribui ona ba kada eleitór tuir mekanismu no jestaun kada STAE munisípiu”, nia dehan.
Diretora Nasionál Teknolojia no Informasaun iha STAE, Tulia de Andrade, informa totál eleitór neʼebé pendente durante fulan-rua ne’e hamutuk 47.510
Hosi númeru ne’e munisípiu Aileu iha 3387, Ainaru iha 3053, Baukau iha 5084, Bobonaru iha 3550, Kovalima iha 2717, Dili iha 13439, Ermera iha 1551, Lautein 3051, Likisá 3308, Manatutu 2453, Manufahi 1876, Oekusi 1286, Vikeke 2392, Ataúru 363.
Eleitór ne’ebé resensia iha sistema ne’e hamutuk 925.247. Hosi númeru ne’e, 137.333 maka atualiza ona, seidauk atualiza iha sistema hamutuk 787.914 no eleitór foun ne’ebé rejistu ne’e iha 14.454. Atualiza ona ba kartaun biométriku ne’e hamutuk 151.787, mane iha 77.999 no feto iha 73.781.
Notísia relevante: Semana oin STAE atribui hikas kartaun biométriku hafoin suspende fulan-rua
Jornalista : Osória Marques
Editora : Rita Almeida
