KOVALIMA, 10 Juñu 2025 (TATOLI) – Sekretariadu Tékniku Administrasaun Eleitorál (STAE), Munisípiu Kovalima, simu ona ekipamentu atu imprimi Kartaun eleitorál biométriku (KEB) ba sidadaun sira , iha munisípiu Kovalima.
“Iha loron 02 Juñu ita simu ona ekipamentu ne’ebé transporta husi STAE nasionál mai iha STAE munisípiu Kovalima mak hanesan, lenkar rihun-neen, ribon 12 ho ribon filme haat. Ne’e ita uza depende eleitór atualiza kartaun eleitorál biométriku”, Diretór STAE Munisípiu Kovalima, Francisco Gusmão, relata dadus ne’e ba jornalista sira, iha nia servisu fatin, Kampung-Baru ohin
Ho ekipamentu ne’ebé mak transporte mai iha Kovalima, Dirijente STAE Kovalima ne’e garante sei uza bele to’o Agostu maibé mós depende ba halo atendementu ba sidadaun sira ne’ebé mak atualiza kartaun eleitorál iha STAE.
Ho ekipamentu ne’ebé mak la iha durante ne’e, STAE arkiva eleitór sira atualiza kartaun eleitoral iha sistema kuaze rihun tolu, nune’e ekipamentu restu bele uza to’o fulan-Agostu tanba kada loron STAE atende mínimu eleitór 20-resin másimu eleitór na’in-30 resin.
STAE hahú arkiva dadus iha sistema hahú iha loron 11 Fevereiru ne’ebé husi nasionál lori ekipamentu mai iha STAE Kovalima iha loron 02 juñu 2025, daudaun ne’e tékniku STAE sira kontinua imprimi kartaun eleitorál biométriku ba sidadaun sira ne’ebé mak STAE arkiva iha sistema.
Tuir dadus hahú hala’o lansamentu sistema atualiza karaun eleitorál biométriku 29 Outubru 2024 to’o mai ohin loron Juñu 2025 eleitór na’in-7,940 ne’ebé mak atualiza ona kartaun eleitorál Biométriku (KEB) husi totál eleitorál na’in-rihun 51 iha munisípiu Kovalima.
Notísia relevante:STAE seidauk bele atende sidadaun atualiza kartaun eleitorál iha postu administrativu
Jornalista:Celestina Teles
Editór: Rafael Ximenes de A. Belo
