DILI, 11 Juñu 2025 (TATOLI)—Autoridade Aduaneira Timor-Leste (TL) hamutuk ho Komunidade Ko’alia Lian Portugés (CPLP-sigla portugeza) hala’o semináriu kona-ba armazein depózitu temporáriu área armazenamentu no zona livre alfándega nian, ho objetivu atu troka esperiénsia hodi hasa’e nivel koñesimentu iha asuntu alfándega.
“Autoridade Aduaneira Timor-Leste nu’udár membru organizasaun alfándega CPLP nian, ita organiza semináriu ida-ne’e ba loron tolu hahú loron 11-13 Juñu ne’ebé iha semináriu ne’e ita indika tópiku ida kona-ba armazenamentu zona franka ne’ebé liga ba servisu autoridade aduaneira nian, ho objetivu atu troka esperiénsia hodi hasa’e nivel koñesimentu iha asuntu alfándega nian,” Komisariu Autoridade Aduaneira, Joanico Pinto, hateten ba jornalista sira, iha JL World, Metiaut, Dili, kuarta ne’e.
Nia afirma, semináriu ida-ne’e iha importánsia boot ba autoridade Aduaneira Timor Leste nian atu reafirma vontade no mantein lasu operasionál sira ho administrasaun aduaneira hotu-hotu husi komunidade nasaun sira-ne’ebé ko’alia lian portugés.
“Realizasaun semináriu ida-ne’e iha Timor-Leste, nune’e ita iha katak sei sai enkontru ida-ne’ebé frutuozu tebes entre alegasaun sira-ne’ebé reprezenta no katak troka koñesimentu no koñesimentu sira hosi nasaun sira haat halo parte CPLP Kontinente Amérika, Europa, Áfrika no Ázia hanesan momentu ida-ne’ebé pozitivu tebes ba implementasaun prosedimentu foun no hadi’a ámbitu jurídiku Alfándega nian tema semana ne’e nian,” nia esplika.
Iha fatin hanesan, Reprezentante Delegasaun CPLP, Ediviga Malinski, hateten enkontru ohin loron nian relasiona ho aduaneiru nian, hanesan propoin iha semináriu ida-ne’e mak armazenamentu temporáriu iha armazein zona livre ba troka esperiénsia entre administrasaun alfándega sira hosi nasaun membru CPLP nian.
“Sira hamosu relasaun institusionál ne’ebé boot liu no buka aplikasaun prosedimentu alfándega nian ne’ebé di’akliu. Ami fiar katak kolaborasaun entre nasaun membru sira hosi komunidade ida-ne’e mak xave atu hetan opsaun sira-ne’ebé di’akliu,” Ediviga Malinski haktuir.
Aleinde ne’e, Reprezentante Sekretariadu Permanente Konferénsia, Deolinda Simões, afirma semináriu multilaterál entre nasaun sira husi Komunidade Luzófona ne’e halo-parte iha lista atividade sira-ne’ebé planeia ba 2025 ne’ebé mak propoin husi Timor-Leste hetan aprovasaun iha enkontru ikus ida iha Angola iha tinan kotuk.
“Timor-Leste konsidera komérsiu nian iha kontestu komérsiu internasionál iha nivel mundiál ho nesesidade ba tempu médiu tanba atividade Alfándega nian mak efikásia komersiál iha luta hasoru fraude no evazaun fiskál simultaneamente,” Deolinda tenik.
Jornalista: Felicidade Ximenes
Editór: Xisto Freitas da Piedade
