VIKEKE, 11 Juñu 2025 (TATOLI)—Konstrusaun sistema bee-moos ba suku Uaibobo, postu administrativu Ossú, munisípiu Vikeke, ninia progresu fíziku daudaun ne’e atinje ona 85%.
Xefe suku Uaibobo, Golarte Melo Guterres, hateten projetu konstrusaun sistema bee-moos ne’ebé uza sistema bomba ninia orsamentu mai husi Programa Nasionál Dezenvolvimentu Suku (PNDS) husi siklu VI tinan 2024 ba suku Uaibobo ne’e, príoridade mak kanalizasaun bee-moos ba komunidade ne’ebé besik atu fínaliza ona.
“Tanba obra ne’e ami konstrui tanke rezervatóriu ida iha bee-matan no tanke distribuisaun bee-moos ida no instalasaun kanu distribuisaun ba tanke distribuisaun mós hotu ona. Hela item ne’ebé mak ami seidauk konklui kran loke bee nian ne’ebé hela tolu mak seidauk monta. Bainhira ami monta hotu kran tolu ne’e, entaun ami-nia obra tama ona ba final 100%,” Xefe suku Uaibobo ne’e hateten ba Agência tatoli iha postu Ossú, ohin.
Sistema bee-moos ne’e uza bomba hafoin distribui bee husi bee-matan ba tanke rezervatóriu no kontinua ba tanke sira-ne’ebé instala iha sentru sira hodi komunidade bele asesu.
“Eletrisidade ne’ebé liga ba bomba instala ona no ami koko ona bomba maibé eletrisidade ninia forsa mak la to’o. Entaun, labele fornese bee husi bee-matan ba iha tanke rezervatóriu. Ida-ne’e mak agora sai hanesan problema ne’ebé ami hasoru iha terrenu. Nune’e, ami mós informa ona ba parte Eletrisidade Timor Leste, Empreza Públika (EDTL, E.P) no PNDS hodi buka solusaun,” nia relata.
Nia hateten, sistema bee-moos ne’e dada husi bee-matan Uaiaku Lebe ho distánsia purvolta metru 300 ne’ebé lokaliza iha suku Uiabobo, hodi fornese bee-moos ba komunidade suku Uaibobo tomak.
“Instalasaun bee-moos ne’e ami sei tau iha sentru mak ita-nia komunidade asesu. Tanba, bazeia mós ba orsamentu ne’ebé iha, nune’e agora ami labele instala ba kada uma kain ida-idak nia uma. Maibé, aban bain-rua orsamentu ruma iha tán mak ami instala ba kada komunidade nia uma,” nia dehan.
Enkuantu, obra PNDS implementasaun sistema bee-moos iha suku Uaibobo gasta orsamentu totál hamutuk $44.000 ne’ebé konstrui husi komunidade suku Uaibobo.
Projetu Sistema bee-moos ba suku Uibobo aldeia tolu kompostu husi aldeia Leo, Mundailo no aldeia Uanisi ho totál benifisiáriu purvolta uma-kain 70 sei asesu ba sistema bee-moos.
Jornalista : Vitorino Lopes da Costa
Editór : Cancio Ximenes
