DILI, 11 Juñu 2025 (TATOLI)—Diretór Interinu Institutu Nasionál Farmasia, Produtu no Medikamentu (INFPM), Miguel Soares, rekoñese reajente ba moras hepatitis estoke mamuk iha armazein INFPM.
“Kona-ba reajente ba moras hepatitis daudaun estoke mamuk hela, maibé prosesu kompra la’o hela no espera katak iha tempu badak bele responde ba ezijénsia sira hosi fasilidade saúde sira,” Miguel Soares dehan ba jornalista sira iha nia kna’ar fatin, Kampung Alor, kuarta ne’e.
Nia afirma, kona-ba ba estoke mamuk hosi INFPM, nafatin tau konsiderasaun nune’e bainhira estoke to’o mai iha armazein sentrál, bele distribui kedas ba fasilidade saúde sira-ne’ebé mak hato’o pedidu mai.
Tuir nia katak bainhira empreza kompra tarde mak INFPM sei foti desizaun hodi kompra emerjénsia ho kuantidade ne’ebé mak natoon.
“Karik mai mak tarde uitoan, hakarak ka lakohi, ami konsellu tékniku husi INFPM deside atu halo kompra emerjénsia ho kuantidade natoon para uza ba nesesidade urjente,” nia konklui.
Jornalista: Felicidade Ximenes
Editór: Xisto Freitas da Piedade
