DILI, 11 Juñu 2025 (TATOLI) – Governu aprova aprezentasaun kandidatura Timor-Leste nian hodi sai uma-na’in ba Kongresu Internasionál ba Edukasaun Ambientál husi País no Komunidade Lian Portugés (CPLP, sigla portugés) – EALUSÓFONA 2027 nian ba da-9.
Ministru Transporte no Komunikasaun, Miguel Menetelu, ne’ebé asume knaar nu’udar Ministru Koordenadór Asuntu Ekonómiku no Ministru Turizmu no Ambiente ein-ezersísiu, informa eventu ne’e propoin sei hala’o iha Rejiaun Administrativa Espesiál Oekusi Ambenu, entre loron 19 no 23 fulan-Jullu 2027.
“Husu Konsellu Ministru atu aprova deliberasaun ida, tanba iha Jullu [tinan ne’e] iha Kongresu Edukasaun Ambientál husi nasaun sira ko’alia lian portugés nian iha Brazíl no tinan rua tuirmai ita atu husu hanesan kandidatura ba uma-na’in Kongresu Edukasaun Ambientál nian iha Timor-Leste iha 2027”, Miguel Manetelu hateten iha Palásiu Governu, ohin.
Nia esplika katak hafoin Konsellu Ministru aprova deliberasaun ne’e, iha Jullu ne’e, Diretora-Jerál husi Ambiente sei partisipa iha kongresu daualuk iha Brazíl no ida dasiak ne’e Timor-Leste husu para mai halo iha país no fatin ne’ebé atu halo ne’e iha Oekusi ho razaun tanba tuir regra ne’ebé iha kongresu ida-ne’e sempre halo iha illa sira ne’ebé fora husi kapitál.
Tuir nia, kongresu ida-ne’e nu’udar plataforma multilaterál privilejiada ida hodi fahe esperiénsia sira, promove kooperasaun internasionál no dezenvolve estratéjia edukasaun ambientál nian ne’ebé komún.
Bainhira hala’o eventu ida-ne’e iha Timor-Leste sei tulun atu hasa’e konxiénsia ambientál iha nasaun ne’e, enkoraja fahe prátika di’ak sira no konsolida papél ativu Timor-Leste nian hodi promove sustentabilidade ekolójika iha espasu CPLP, iha tempu ne’ebé mundu hasoru hela krize ambientál ne’ebé laiha presedente.
Konsellu Ministru mós deside atu fó responsabilidade ba Ministériu Turizmu no Ambiente atu koordena, hamutuk ho ministériu relevante sira no parseiru nasionál no internasionál sira, asaun nesesáriu hotu-hotu ba preparasaun, organizasaun no realizasaun kongresu, inklui prosesu formál kandidatura nian.
Atividade ne’e sei envolve mós Ensinu Superiór sira tanba sei inklui estudante no sosiedade sivíl sira.
Nune’e autoriza mós submisaun pedidu ko-finansiamentu ho montante rihun $150 ba Fundu Espesiál CPLP nian, iha ámbitu orsamentu totál estimativa rihun $500, ne’ebé prepara ona iha parseria ho Sentru Edukasaun no Informasaun Ambientál (SEIA), Asosiasaun Portugeza ba Edukasaun Ambientál (ASPEA) no Rede Luzófona ba Edukasaun Ambientál (REDELUSO).
Jornalista: Arminda Fonseca
Editora: Maria Auxiliadora
