Fulan-oin mak UCT implementa projetu ESE-RAIZ
DILI, 12 Juñu 2025 (TATOLI)-Universidade Katólika Timorense (UCT, sigla portugés) ne’ebé simu responsabilidade husi governu hodi implementa projetu Eskola Superiór ba Edukasaun (ESE-RAIZ) sei akontese fulan-oin.
Projetu foun husi governu ida-ne’e ho objetivu estabelese eskola universitáriu ne’ebé dedika formasaun inisiál ba professor sira husi eskola primária no sekundária nian, ne’ebé foka ba eselénsia edukasionál no promove lian-portugés.
Subvensaun ho valór anuál másimu millaun $1 ne’ebé aprova iha Konsellu Ministru iha loron 4 fulan-Juñu sei aloka ba Fundasaun São Paulo Arkidioseze Dili, entidade fundadora UCT.
Reitór UCT, Padre Joel Casimiro Pinto, hatete fulan-oin ninia parte hahú inskrisaun no selesaun ba kandidatu sira. Tanba, envia ona karta ba Prezidente Autoridade no diretór edukasaun munisípiu sira hodi kolabora.
“Ita-nia planu ne’e kada munisípiu ema na’in rua, tanba tinan ida-ne’e ita simu uluk na’in 50. Depende ba selesaun sira bele hatama naran barak tuir teste, iha teste ne’e iha eskrita no oral”, dehan nia ba TATOLI iha Balide, ohin.
UCT sei uza lian-portugés ba selesaun. Tanba, UCT nia prosesu aprendizajen utiliza lian-portugés no inglés.
Maneira seluk atu enkoraja kandidatu, Padre Joel Casimiro dehan bainhira selesionadu ida mak pasa ona maibé hasoru difikuldade iha lian, parte universidade oferese semester pre-universitáriu hodi tulun aprende dalen portugés, inglés no metódu estuda iha universitáriu.
“Sira ne’ebé remata iha 2022, 2023, 2024 mak iha posibilidade atu kandidata ba selesaun ne’e”, nia dehan.
Projetu ne’e sei ba lisensiatura de’it. Tanba ne’e, Padre Joel konvida parte hotu iha munisípiu atu tulun nafatin no kolabora hodi estabelese informasaun edukasaun ne’ebé di’ak ba futuru.
“Ita hakarak agradese ba Governu tanba tulun nafatin instituisaun privada sira, liu-liu ensinu superiór hodi kontribui ba dezenvolvimentu nasionál”, nia agradese.
Projetu ne’e prioridade ba fakuldade edukasaun liuliu iha área siénsia ezata, biolojia, kímika, matemátika, fízika, no tinan oin sei iha tán área balun.
Na’in ba proposta ne’e maihusi Ministru Ensinu Superiór, Siénsia no Kultura, José Honório da Costa Pereira Jerónimo.
Notísia relevante: Governu kria subvensaun millaun $1 ba implementasaun projetu ESE-RAIZ
Jornalista : Osória Marques
Editora : Rita Almeida
