DILI, 12 Juñu 2025 (TATOLI)—Sekretaria Estadu Kooperativa (SEKOOP) fó treinamentu ba grupu kooperativa hamutuk hitu kona-ba prosesamentu Bafo Kay Rala sai hanesan ai-han oinoin, iha Munisípiu Dili.
“Ita fó treinamentu ba grupu kooperativa sira iha Dili, ba prosesamentu Bafo Kay Rala. Programa ida-ne’e tama iha Planu Asaun Anuál iha tinan 2025 ne’ebé iha ona produtu presiza transforma sai produtu finál, tanba kultiva Bafo Kay Rala hanesan matéria prima oioin,” Sekretáriu Estadu Kooperativa, Arsénio Pereira, dehan ba jornalista sira, bainhira halo abertura ba formasaun prosesamentu Bafo Kay Rala sai produtu oinoin ba movimentu kooperativa hamutuk hitu iha Munisipiu Dili, kinta ne’e.
Nia hateten, movimentu kooperativa sira sei prodús depois transforma hotu sai hanesan produtu no lori bá merkadu, grupu kooperativa sira mai tuir treinamentu ne’e mak hala’o duni atividade ne’e.
“Feto potensiál sira-ne’e atu fornese ba instituisaun Governu ho Estadu hakarak produtu lokál, entaun sira mai aprende lori produtu lokál sira-ne’e sai hanesan ai-han oinoin iha rai laran,” nia haktuir.
Nia informa, programa Governu nian hanesan agríkola ida-ne’ebé bele fornese ba merenda eskolár, tanba merkadu mak merenda eskolár no presiza prodús ai-han ne’ebé nutritivu. Tanba transforma ai-han ne’ebé nutritivu atubele fó oan sira konsume hahán nutrisaun di’ak ba dezenvolvimentu fíziku no hanoin di’ak nune’e sira estuda ho di’ak.
Governu liuhusi Sekretaria Estadu Kooperativa ho programa ne’ebé prodús ne’e tama iha lista hodi fornese bá merenda eskolár.
“Programa ne’e definidu ona katak bele prosesa halo modifikasaun ba dosi no ai-han oinoin hodi fornese ba merenda eskolár,” nia hateten.
Iha fatin hanesan, Diretora Nasionál Promosaun Produtu no Kooperativa, Ana Paula Pacheco de Fátima Magno, hateten formasaun ida-ne’e tau planu ba daruak ne’ebé hala’o iha Munisípiu Ainaru, Lautein, Baukau no Vikeke no ikusliu iha Dili.
“Tanba ita hotu hatene Bafo Kay Rala hanesan produtu prinsipál ne’ebé tama iha Governu Konstitusionál Dasiak liuhusi Sekretaria Estadu Kooperativa,” Ana Paula Pacheco informa.
Nia tenik, Bafo Kay Rala ponténsia bele fornese bá iha merkadu nasionál no internasionál, atu introdús ba partisipante sira hamutuk 22 ne’ebé tuir treinamentu referidu.
Diresaun Nasionál Promosaun Produtu no Kooperativa husu membru kooperativa sira utiliza formasaun loron tolu ne’e nune’e hamutuk dezenvolve produtu Bafo Kay Rala sai di’ak liután.
Entretantu, Sekretaria Estadu Kooperativa fó treinamentu ba grupu kooperativa hamutuk hitu mak hanesan CU. Dadirah totál membru ema na’in-rua, CU. KFTL ema na’in-haat, CU. MBX ema na’in-haat, CU. Pao Moris ema na’in-rua, CU. Feto Potensiál ema na’in -rua, Dino Catering ema na’in-neen no CU. Emprendedorizmu ema na’in-rua.
Jornalista: Felicidade Ximenes
Editór: Xisto Freitas da Piedade
