HNGV hala’o simpóziu dahuluk ba kuidadu emerjénsia iha TL
DILI, 12 Juñu 2025 (TATOLI)—Hospital Nacional Guido Valadares (HNGV), hala’o simpóziu dahuluk ba kuidadu emerjénsia iha Timor-Leste (TL), hodi hasa’e koñesimentu profisionál saúde nune’e bele fó atendimentu di’ak ba pasiente sira.
“Objetivu husi halo atividade ne’e iha buat rua. Primeiru, ita atu konsolida forsa servisu iha área kuidadu emerjénsia, hahú husi nasionál, referrál no ospitál atu koñese malu no fahe malu oinsá kona-ba servisu nian. Segundu, sira bele foti no rona problema sira atu tau programa hodi hasa’e kapasitasaun profisionál saúde,” Prezidente Komisaun Organizadora ba Simpóziu dahuluk, Eldegar Lopes Martins, hateten ba jornalista sira iha Salaun CNE, Dili, kinta ne’e.
Nia esplika, daudaun ne’e doutór espesialista ba kuidadu emerjénsia foin na’in rua de’it, tan ne’e ospitál referrál sira-ne’e mós tenke iha espesialista para hasa’e kualidade atendimentu.
“Kuidadu emerjénsia médiku akontese ba sé de’it. Dalaruma ema hela iha Lolotoe ne’ebá kona emerjénsia médiku. Situasaun sira-ne’e bele akontese. Ezemplu, iha ema-nia hirus-matan moras ka struk, ema monu iha-ne’ebá, lori halai bá sentru saúde, doutór sira ne’ebá laiha kapasidade halo atendimentu ne’e problema, ka doutór iha-ne’ebá atende maibé sasán laiha entaun ida-ne’e halo advokasia atu ita-nia nai-ulun sira atu haree ida-ne’e,” Eldegar esplika.
Entretantu, Ministra Saúde, Elia dos Reis Amaral, husu ba profisionál saúde atu halo atendimentu ba pasiente sira hatudu domin tanba dalaruma pasiente balun mai ho presaun nune’e husu atu profisionál saúde sira halo akompañamentu nafatin ho oin-midar.
“Ita hotu hatais bata mutin, halo atendimentu ho domin ba ita-nia komunidade. Talvez mós ita-boot sira hanoin, ita-nia komunidade mai ospitál la’ós de’it sira moras. Bainhira sira la moras maibé iha presaun ruma, ne’e mak ha’u dehan psikolojikamente akompaña. Kadavez husi ita-boot sira-nia oin-midar, bele rezolve sira nia saúde,” nia fó sujestaun.
Partisipa iha simpóziu dahuluk ne’e mai husi Departamentu Saúde husi F-FDTL, Departamentu Saúde PNTL, Diretór sira husi Ministériu Saúde, dirijente husi HNGV, peritu Internasionál no mós profisionál saúde sira.
Jornalista: Felicidade Ximenes
Editór: Xisto Freitas da Piedade
