DILI, 12 Juñu 2025 (TATOLI)-Hahalok hirus mak efeitu-ida husi asaun sira seluk ne’ebé obrigadu lori ema hela iha komarka tuir atu ne’ebé komete iha sosiedade.
Kontrola hahalok hirus presiza mós liuhusi formasaun. Tanba ne’e, Sekretariu Estadu asuntu Igualdade realiza sesaun ne’e ba prizioneiru sira iha estabelesimentu prizionál Bekora durante loron haat, hahú segunda – kinta, ohin.
Preso hamutuk 36 ne’ebé partisipa, simu matéria sira hanesan aumenta motivasaun, oinsá bele koñese ida-idak nia-aan, aumenta konsiénsia, responsabilidade, oinsá jere emosaun, oinsá dezenvolve estratejia hodi la hamosu violénsia maske ho espresaun hirus.
Diretora Nasionál Polítika Igualdade Jéneru, Olga da Costa Monteiro, hatete importante tebes dadur sira transforma enerjia negativu ba pozitivu.
“Mai ita hamutuk prevene violénsia bazeia ba jéneru no la husik ema ida iha kotuk”, dehan nia ba jornalista sira hafoin ensera formasaun referida iha komarka Bekora, ohin.
Diretór Nasionál Servisu Prizionál no Reinsersaun Sosiál husi Ministériu Justisa, Delvio Alves, hatutan asaun kontreta governu nian liuhusi SEI hatudu katak Estadu ida-ne’e sei la husik ema ida iha kotuk.
Formasaun daruak tinan ne’e sei akontese semana oin iha prizaun Glenu no Suai.
SEI iha adopta Lei Kontra Violénsia Doméstika iha 2010, no 2012 trasa kedas Planu Asaun Nasionál Kontra Violénsia Bazeia ba Jéneru ho programa xavi maka formasaun kona-ba kontrola Hahalok Hirus ba maluk sira ne’ebé hela iha prizaun sira iha Timor-Leste ninian.
Notísia relevante: Ekipa SEI no MJ fó formasaun ba prizoneiru sira iha Becora kona-ba hahalok hirus
Jornalista : Osória Marques
Editora : Rita Almeida
