ME nafatin apoia prestasaun servisu iha AAM sira
BAUKAU, 12 Juñu 2025 (TATOLI)—Governu liuhosi Ministériu Edukasaun (ME) kontinua garante no prontu fó apoia asisténsia teknika ba prestasaun servisu iha Autoridade Administrasaun Munisipál (AAM) no Autoridade Administrasaun Ataúru.
Ministra Edukasaun, Dulce de Jesus Soares, esplika prezensa iha Baukau nu’udár parte fó apoia ba Ministériu Administrasaun Estatál (MAE) kona-ba prestasaun serbisu ho atendimentu ba komunidade liuhosi programa asisténsia téknika ba prestasaun serbisu Autoridade Administrasaun Munisipál (AAM) no Autoridade Administrasaun Ataúru.
“Presiza Ministériu rua serbisu hamutuk liuliu Prezidente Autoridade Munisipál (PAM) sira bele garante katak implementasaun programa sira-ne’e la’ós de’it ezekusaun orsamentu maibé atu haree prestasaun serbisu bele responde duni tuir programa sira-ne’e,” Ministra Edukasaun hateten iha Sentru Konvensaun Baukau (CCB-sigla portugeza) Vila Antiga, kinta ne’e.
Governante ne’e salienta Ministériu Edukasaun transfere ona kompeténsia liuhosi desentraliza programa rua ba munisípiu sira hanesan merenda eskolár ho konsensaun eskolár nune’e nasionál presiza fó apoia asisténsia durante prosesu munisípiu sira ezekuta programa rua referidu.
Nia subliña, mezmu orsamentu ba programa sira-ne’e kanaliza liuhosi MAE maibé estrutura ME eziste iha munisípiu to’o baze hanesan Diretór Serbisu Munisipál Edukasaun, Inspetór Eskolár no Diretór Eskola nune’e laiha razaun atu hasees aan no kontinua reforsa liután desentralizasaun administrativa tanba benefísiu ba estudante sira.
“Tinan-tinan Governu sentrál hadi’a programa merenda eskolár, sim, sei iha faillansu uitoan maibé ita hotu sei esforsu atu aloka lalais orsamentu nune’e bele to’o iha benefisiáriu sira,” Dulce Soares informa.
Dulce husu Autoridade Munisipál liuhosi PAM inklui Sekretáriu Munisipál sira atu serbisu hamutuk ho ME tanba konsideradu besik liubá komunidade hanesan hadi’a ós pontualidade profesór nune’e prosesu desentralizasaun ne’e bele hala’o ho di’ak.
Entretantu, prezensa Ministra Edukasaun, Dulce de Jesus Soares, iha Baukau reprezenta Governu hodi lansa programa Ekipa Asisténsia Téknika ba prestasaun serbisu AAM no Autoridade Administrativa Ataúru ne’ebé hetan partisipasaun husi Prezidente Autoridade Munisipál inklui kargu serbisu munisipál sira.
Jornalista: Natalino Belo
Editór: Xisto Freitas da Piedade
