DILI, 12 Juñu 2025 (TATOLI)—Prezidente Tribunál Rekursu (PTR), Afonso Carmona, Kinta ne’e, hasoru malu ho Prezidente Repúblika (PR), José Ramos Horta, hodi informa kona-ba instalasaun Supremu Tribunál Justisa.
“Ha’u mai informa kona-ba preparasaun instalasaun Supremu Tribunál Justisa ho faze inísiu iha loron 30 Juñu ne’e ita sei hahú uluk ho semináriu ida atu halo instalasaun ba Supremu Tribunál,” Carmona hateten ba jornalista sira hafoin ramata reuniaun ho Xefe Estadu, iha Palásiu Prezidensiál, Bairru Pité.
Nia dehan, semináriu ne’e atu akumula hanoin sira husi parte hotu atu nune’e Supremu Tribunál Justisa ne’e bele di’ak liu.
“Antes instala ita tenke rona uluk lai hanoin sira husi públiku, bainhira hotu semináriu ne’e mak ita sei haree fali ba buat seluk ne’ebé presiza atu halo tan kona-ba instalasaun ne’e ho rekursu umanu ne’ebé ita iha atu priense ba vaga sira ne’ebé iha, maibé ida-ne’e fulan-Jullu mak ita sei ko’alia,” nia dehan.
Notísia relevante : Ministru Justisa sei hala’o enkontru ho PTR no PJR aborda instalasaun Supremu Tribunál Justisa
Rekorda fali katak, Ministru Justisa, Sergio Hornai, konvoka ona enkontru ho Prezidente Trubunál Rekursu Prokuradór Jerál Repúblika (PJR) inklui Defensór Públiku Jerál hodi aborda kle’an ba preparasaun instalasaun Supremu Tribunál Justisa.
Antes ne’e mós Xefe Estadu polítikamente deklara ona katak molok nia mandatu termina tenke instala ona Supremu Tribunál Justisa, tanba ne’e, Ministru Justisa nu’udár entidade ne’ebé reponsável ba setór justisa sei buka koordenasaun nune’e bele instala.
Lei Organizasaun Judisiária ne’ebé foin daudaun halo primeira alterasaun ne’e fó biban ba Prezidente Tribunál Rekursu ka Prezidente Supremu Tribunál Justisa atu haree kona-ba asuntu ne’e.
Instalasaun Supremu Tribunál Justisa ne’e importante nune’e bele fó esperansa di’ak ba Timor-Leste ka lori justisa ne’ebé di’ak ba povu.
Kona-ba rekursu ba Supremu Tribunál Justisa ne’e Timor-Leste iha juíz terseira klase, segunda klase, primeira klase no Lei Organizasaun Judisiária, ne’ebé fó biban ba Prezidente Tribunál Rekursu halo promosaun ba juíz sira.
Jornalista : Hortencio Sanchez
Editora : Julia Chatarina
