DILI, 12 Juñu 2025 (TATOLI) – Empreza Wego Medical iha Shanghai-China disponibiliza mákina fase raan unidade 10 ba Governu Timor-Leste.
Ekipamentu ne’e entrega liuhusi emprezária timoroan, Clarisa Lay, ba Primeiru-Ministru, Xanana Gusmão, iha Palásiu Governu, Dili, ohin.
Ministra Saúde, Élia dos Reis, dehan mákina ne’e atu ajuda Governu no ida-ne’e importante tebes tanba mákina fase raan sira ne’ebé Ospitál Nasionál iha daudaun ne’e uza tinan naruk ona, tanba sosa hahú husi 2015 no tuirmai iha 2018.
“Ohin entrega simbolikamente [no] akompaña señora Calarisa Lay, restu ita sei prepara fatin. Ekipa ida sei mai husi Xina bá halo instalasaun no fó treinamentu molok utiliza”, ministra hateten.
Tuir planu, mákina sira ne’e sei instala iha ospitál Lahane nian hafoin tau tan bá iha ospitál referénsia sira seluk.
Iha fatin hanesan, Clarisa Lay dehan hanesan emprezária timoroan iha inisiativa apoia Governu tanba haree difikuldade ne’ebé iha. “Importante mak bele kolabora di’ak ho ita-nia parseiru sira husi li’ur. Apoiu ne’e gratuita 100%, tanba kompañia ne’e mós fulan tolu liubá mai vizita ospitál, haree duni katak ita presiza aumenta duni mákina fase raan”, Clarisa hateten.
Apoiu sira ne’e fó tanba antes ne’e empreza Wego mós mai vizita Timor-Leste no hasoru malu ho Ministra Saúde no promote atu tulun Timor-Leste ho mákina fase raan.
“Sira mós husu atu apoia ita, se ita mós bele fó ita-nia ema tékniku 30 kada tinan bá iha Xina hodi tuir treinamentu”, dehan.
Jornalista: Arminda Fonseca
Editora: Maria Auxiliadora
