DILI, 13 Juñu 2025 (TATOLI) – Governu realiza Jornada Orsamentál 2026 hodi prepara Orsamentu Jerál Estadu (OJE) ho tema “Otimiza Rezultadu sira ho Despeza Realístiku sira” ho objetivu atu permite halo análize ba prioridade nasionál sira no define senáriu tetu fiskál ba ezersísiu tinan 2026 nian.
Tuir dokumentu Governu nian, jornada orsamentál ne’ebé hala’o ohin hanesan parte ida husi kalendáriu preparasaun orsamentu tinan oin nian, ne’ebé fahe tiha ona ba entidade públika hotu-hotu, iha loron 13 Juñu 2025.
Sorumutu Jornada Orsamentál hala’o iha Auditóriu Kay Rala Xanana Gusmão, iha Ministériu Finansa, Dili hetan abertura husi Primeiru-Ministru, Xanana Gusmão.
Iha jornada iha sesaun dadeer ne’e, sei iha aprezentasaun oioin husi Ministériu Finansa, inklui panorámika ida kona-ba kontestu makroekonómiku no sosiál, análize dezempeñu reseita nian iha tinan hirak liubá, no panorama fiskál.
Iha mós intervensaun espesífika sira kona-ba dezempeñu no dezafiu prinsipál sira ne’ebé hasoru husi setór finanseiru no privadu sira ho partisipasaun husi Banku Nasionál Komérsiu Timor-Leste (BNCTL, iha portugés) no Kámara Komérsiu no Indústria Timor-Leste (CCI-TL, iha portugés).
Iha parte loraik, Ministériu Finansa sei halo mós prezentasaun foun tolu ne’ebé foka liu ba dezempeñu husi despeza sira iha tinan hirak liubá, despeza obrigatória sira no senáriu fiskál indikativu ba tinan 2026.
“Sei iha espasu diskusaun entre partisipante sira. Sesaun jornada orsamentál ne’e sei remata iha tuku 5:30 lokraik”, nota ne’e dehan.
Jornalista: Arminda Fonseca
Editora: Maria Auxiliadora
