KOVALIMA,13 Juñu 2025 (TATOLI) – Komandu Polísia Nasionál Timor-Leste (PNTL), Munisípiu Kovalima, komemora loron Padroeiru Santo António, ne’ebé sai mahein ba instituisaun PNTL, iha loron 13 Juñu – hala’o kada tinan, ho atividade esensiál rua hanesan hala’o prosesaun husi komandu ba Igreja Ave Maria Suai no husu misa agradesimentu.
Padre Pároku Igreja Nossa Senhora de Fátima Suai, Amu Aderito da Costa Vilar Morreira iha entrevista, dehan, Mahein Santo António harohan da’et ba PNTL, presiza presta servisu ho responsabilidade.
“Santo António, santo ne’ebé boot no harohan d’aet ba Polísia Nasionál Timor-Leste (PNTL) tanba haraik aan no hatene hadomi, sai nafatin masin no naroman iha mundu”, Amu Aderito da Costa Vilar Morreira hato’o hafoin prezide misa agradesimentu, iha Igreja Suai, ohin.
Mahein Santo António sai hanesan inspirasaun boot. Nia hanorin no nia ezemplu bele tulun ba PNTL sira sai masin iha sira-nia aan rasik no sai naroman. Labele sai hanesan ahi manas.
“Manas hanesan ahi ema bele haroman no hakbesik ba ita hakuak no halo ema seluk rona ita liusi ita-nia hahalok di’ak tuir ita-nia misaun servisu iha responsabilidade ba servisu”, nia fó hanoin.
Atu iha responsabilidade ba servisu mak presiza unidade no servisu hamutuk durante presta servisu Estadu no Governu tau iha sira-nia kbaas sai hanesan lutu nasaun no povu nian.
Ho komemorasaun loron Santo António PNTL atu hadomi sira-nia servisu, nasaun no povu ne’ebé Maromak fó ona konfiansa ba sira.
Iha sorin seluk, Reprezentante Komandante PNTL Munisípiu Kovalima, Superintendente Asistente Polísia Joaquim da Costa rekoñese katak Santo António hanesan mahein PNTL nian tanba ne’e kada tinan komemora loron referidu.
“Selebrasaun loron santo hanesan PNTL husu de’it misa agradesimemtu. Ita hatene Santo António iha nia vida hala’o atividade relijiozu hodi hatudu nia vokasaun tomak hodi servi sarani sira. Ho nia atendementu mak PNTL eskolla Santo António nu’udar ita-nia mahein”, autoridade polisiál ne’e dehan.
Knaar PNTL sai ona banati husi mahein Santo António tanba PNTL durante ne’e servi komunidade nune’e Santo António sai hanesan matadalan liuhusi knaar PNTL atu bele garante estabilidade ba komunidade nune’e livre halo movimentu.
Jornalista:Celestina Teles
Editór: Rafael Ximenes de A. Belo
