DILI, 13 Juñu 2025 (TATOLI) – Tribunál Judisiál Primeira Instánsia Dili, sesta ne’e hala’o interrogatóriu dahuluk hodi aplika aprezentasaun periódika ba arguida SE ne’ebé envolve krime tentativa omisídiu hasoru nia la’en kaben iha loron kuarta (11/6).
Iha sala julgamentu, Ministériu Públiku liuhusi Prokuradór Luís Hernani Rangel promove arguida ho krime tentativa ne’ebé previstu artigu 138, krime ofensa integridade fízika artigu 146 husi Kódigu Penál Timor-Leste no krime arma branka lei númeru 5/2017.
Defeza husi arguida S.E, Defensór Públiku Estaquio Guterres, esplika, tribunál halo interrogatóriu dahuluk ba arguida S.E tanba envolve krime tentativa omisídiu ka uza tudik sona lezada no baku lezada ho inisiál C tanba iha relasaun problema família.
“Hafoin halo tiha interrogatóriu dahuluk, Tribunál aseita aplika aprezentasaun periódika ba arguida S.E ne’ebé aprezenta-aan iha eskuadra Polísia besik kada fulan-ida, dala-ida,” Estaquio hateten ba jornalista sira iha TJPID, Kaikoli, sesta ne’e.
Nu’udar asistente legál ba arguida S.E aseita ho desizaun Trubunál hodi fó biban ba Ministériu Públiku kontinua halo investigasaun.
Nia informa, kondisaun lezada di’ak hela, maibé Ministériu Públiku kontinua halo investigasaun ba kazu ne’e.
Jornalista: Natalino Costa
Editór: Evaristo Soares Martins
