Ema deskoñesidu soe bebé iha mota Vikeke Vila ho kondisaun mate
VIKEKE, 16 Juñu 2025 (TATOLI)—Ema deskoñesidu ida soe bebé mane ida iha mota ponte Gantung (tara) iha suku Karaubalu, postu administrativu Vikeke Vila, munisípiu Vikeke.
“Ema soe bebé iha ponte Gantun nian ne’e ita seidauk identifika ema ruma ba aktu referidu. Nune’e ha’u kordena ho polísia sira hodi buka tuir suspeitu ne’ebé soe bebé. Ita-nia komunidade sira hetan bebé iha maizumenu tuku 07h00 dadeersan. Alin feto ida ba fase roupa iha mota laran mak hetan bebé ne’e ema tau iha sakola mutin ida-nia laran. Nune’e, nia bolu komunidade foti tiha bebé no hanoin sei moris entaun lori bá internamentu maibé médiku sira haree bebé ne’e mate tiha ona,” Xefe suku Karaubalu, João Pinto, haktuir ba Agência Tatoli iha postu Vikeke Vila, ohin.
Tanba ne’e, nia husu ba autoridade seguransa atu haree ba CCTV ne’ebé Xinés sira montan iha iha sira-nia loja besik área refere, hodi halo identifikasaun ba ema-ne’ebé soe bebé ne’e.
Nia relata, kazu ema soe bebé akontese uluk iha tinan 2017 no agora akontese tan iha postu Vikeke vila.
“Kazu soe bebé ne’e ba dala rua ona. Uluk, akontese ita la identifika ema ruma, espera ida agora ne’e ita bele identifika suspetu, atu nune’e bele halo prevensaun ba kazu soe bebé. Nune’e ha’u husu polísia tenke identifika kle’an kazu referidu,” nia dehan.
Iha fatin seluk, Ofisiál Polisiamentu Suku (OPS), suku Karaubalu, sarjentu xefe, Rui Manuel Freitas, haktuir akontesementu ema deskoñesidu ne’ebé soe bebé ne’e, OPS aprezenta ona ba komandu Polísia Nasionál Timor Leste (PNTL) hodi halo prosesu investigasaun ba kazu referida.
“Kazu soe bebé ne’e akontese domingu (15/06) horisehik, ha’u bolu sasin ne’ebé hetan bebé mane, ne’ebé sasin konta katak nia ba fase roupa iha mota laran mak hetan. Depoiz nia to’o iha mota laran nia hetan sakola. Nune’e sasin haree ba hanoin boneka, nia haree didi’ak fali haree ba ema. Ne’ebé, nia bolu ninia ama, apa no bolu komunidade ba haree hotu mak ba foti bebé ne’e. Sira hanoin bebé sei moris ne’ebé sira lori bá internamentu, maibé doutor sira haree bebé iis laiha ona,” nia esplika.
Nia dehan, PNTL sei buka informasaun kona-ba suspeitu soe bebé no PNTL mós ko’alia hotu ba Xinés sira asegura CCTV.
“Ami sei kontinu prosesu investivasaun hodi buka suspeitu para hetan tanba oho bebé ne’e krime. Nune’e ami sei esforsu buka tuir suspeiru referidu,” nia dehan.
Enkuantu, bebé ne’ebé ema soe parte Solidaridade Sosiál Munisípiu Vikeke hamutuk ho PNTL haloot ona bebé iha semitériu públiku Santa Krus, suku Karaubalu.
Jornalista : Vitorino Lopes da Costa
Editór : Cancio Ximenes
