Avaliasaun MAE iha Kovalima, Deskobre pontu neen
KOVALIMA, 16 Juñu 2025 (TATOLI) – Ministériu Administrasaun Estatál (MAE), tuir rezultadu avaliasaun entre loron 28-31 Outubru 2024, iha área kualidade prestasaun bens no servisu públiku iha autoridade Kovalima deskobre pontu neen.
Ofisiál Diresaun Nasionál Monitorizasaun no Avaliasaun Administrasaun Lokál, Dooddy Antonio Maia, iha nia aprezentasaun foku iha avaliasaun kualidade prestasaun bens no servisu públiku hodi deskobre pontu sira hanesan delegasaun kompeténsia sira maibé limita iha ezekusaun, kapasidade administrativa no téknika ne’ebe limitadu tebes, dezafiu iha jestaun rekursu finanseira, falta iha planu dezenvolvimentu munisipál, Poténsia ba inovasaun no melloria no pozisaun ba kargu xefia iha Autoridade Munisipál Kovalima, balun seidauk prienxidu.
“Métodu avaliasaun ne’ebé ami hala’o iha 2024 halo entrevista direta, verifika direta ba edifísiu iha kada servisu munisipál, rekolla dokumentu komprovativu sira no análize ba dokumentu komprovativu sira”, Dooddy Antonio Maia aprezenta ba Autoridade Kovalima, iha salaun AMC, ohin.
Iha prosesu rezultadu avaliasaun 2024 hodi dekobre ba dahuluk, delegasaun kompeténsia sira maibé limita iha ezekusaun, kompeténsia dupla iha servisu munisipál ho delegasaun territoriál (Rejistru Notariadu no Kadastrál, DNTT, Edukasaun, Saúde, Agrikultura, Protesaun sívil) atualmente kompeténsia referida sei nafatin ezekuta husi nasionál.
Ba daruak, kapasidade administrativa no téknika ne’ebe limitadu tebes hanesan menus funsionáriu kualifikadu no menus formasaun no kapasitasaun ba autoridade munisipál.
Ba datoluk, dezafiu iha jestaun rekursu finanseira hanesan orsamentu ne’ebé aloka la sufisiente, orsamentu balun la aloka ba servisu munisipál, rekursu umanu ne’ebé limitadu implika ba persentazen ezekusaun.
Ba dahaat, falta iha planu dezenvolvimentu munisipál hanesan maioria husi autoridade munisipál sira seidauk finaliza (PDM)
Dalimak, poténsia ba inovasaun no melloria hanesan introdusaun sistema dijitál, plataforma dijital (Dalan ba futuru) introdusaun portál munisipál no introdusaun balkaun úniku.
Deskobrementu ba daneen, pozisaun ba kargu xefia iha autoridade munisipál Kovalima, balun seidauk prienxidu hanesan xefi departamentu na’in rua, iha servisu munisipál administrasaun no rekursu umanu seidauk prienxidu, xefi departamentu prevensaun no informasaun (protesaun sívil), xefi departamentu sokorru no operasaun emerjénsia (Protesaun sívil) no xefi departamentu na’in rua iha servisu munisipál rejistu notariadu no servisu kadastrál.
Objetivu husi avaliasaun ne’e atu hatene prestasaun bens no servisu públiku sira iha ámbitu kompeténsia autoridade munisipál 12 tuir dekretu-lei númeru 3/2016 ho nia alterasaun da-lima ba dekretu-lei númeru 84/2023, relasiona ho preparasaun husi faze desentralizasaun administrativa institusionál ba faze desentralizasaun administrativa territoriál no podér lokál.
Kritériu avaliasaun ba rezidente
Referénsia autoridade tuir Dekretu-lei númeru 84/2023 artigu 25.o. Kompeténsia ba servisu munisipál Dekretu-lei númeru 84/2023 artigu 7.o – 18.o. ho Diploma Ministeriál númeru 85/2023 artigu 2.o – 6.o
Bens móveis no munisipál
Imóveis iha Autoridade munisipàl Dekretu-lei númeru 84/2023 artigu 56.o ho diploma Ministeriál númeru 85/2023 artigu 14.o.
Jornalista:Celestina Teles
Editór: Rafael Ximenes de A. Belo
