BAUKAU, 17 Juñu 2025 (TATOLI)—Asidente tráfekgu entre kareta Fuso ho motorizada iha área Sagadate, Postu Administrativu Laga, Munisípiu Baukau, rezulta vítima inisiál GAX lakon vida.
Asidente tráfegu referidu akontese iha segunda (16 Juñu) purvolta tuku 16:30 ne’ebé tuir kronolojia vítima mane idade 26 kondús motór marka Beat ho xapa matríkula Y.5179 husi diresaun Laga Vila ba Sagadate, maibé mosu asidente tráfegu ho kareta operasaun kompañia ne’ebé responsabiliza reabilitasaun estrada Laga bá Baguia tanba deskonfia vítima xoke husi kotuk nune’e monu iha kareta okos hodi rezulta lakon vida.
“Polísia nia serbisu rekolla no entrega mate-isin bá família, lori suspeitu mai Komandu PNTL Baukau para ita prosesu ba Ministériu Públiku,” Komandante PNTL Munisípiu Baukau, Superintendente João Sancho Pires hateten iha ninia kna’ar fatin, Vila Nova, Baukau, tersa ne’e.
Superintendente Pires salienta, mezmu seidauk hatene kle’an motivu husi asidente tráfegu ne’e, maibé parte PNTL liuhosi Seksaun Tránzitu rekolla informasaun no rekolla evidénsia kontinua prosesa bá Ministériu Públiku (MP).
“Ita sei halo investigasaun kle’an liubá kazu ida-ne’e no ba MP mak haree,” Komandante ne’e haktuir.
Entretantu, suspeitu inklui evidénsia sira hanesan kareta Fuso no motór Beat daudaun ne’e aseguradu ona iha Komandu PNTL Munisípiu Baukau hodi hein prosesu kontinuasaun iha MP.
Jornalista: Natalino Belo
Editór: Xisto Freitas da Piedade
