Embaixadór Irlanda fiar Timor-Leste sei lori valór demokrasia ba ASEAN
DILI, 17 Juñu 2025 (TATOLI) – Embaixadór Irlanda ba Timor-Leste no Indonézia, Padraig Francis, fiar katak Timor-Leste sei sai lian importante iha ASEAN hodi lori valór demokrasia no respeitu direitu umanu nian.
Deklarasaun ne’e hato’o husi embaixadór Padraig Francis hafoin halo sorumutu despedida nian ho Primeiru-Ministru, Xanana Gusmão, iha Palásiu Governu, ohin.
“Timor-Leste iha tradisaun demokrasia ne’ebé maka’as no respeitu ba direitu umanu. Ha’u iha serteza katak nasaun ida-ne’e sei sai lian importante ida iha ASEAN”, nia akresenta.
Tuir nia, maski Timor-Leste nasaun ki’ik hanesan Irlandia, maibé iha espíritu no responsabilidade boot atu hala’o papél ativu iha mundu.
Iha biban ne’e, diplomata ne’e mós subliña katak Irlanda iha nafatin kompromisu atu apoia dezenvolvimentu rekursu umanu iha Timor-Leste, liuhusi programa bolsa estudu.
“Tinan ne’e, ami hein katak sei iha estudante timoroan na’in-tolu ne’ebé sei estuda iha Irlanda, liuhusi Programa Bolsa Estudu Irlanda ba nasaun sira iha dezenvolvimentu. Ne’e hanesan parte ida husi ami-nia esforsu sira hodi apoia kapasitasaun ba joven sira Timor-Leste nian”, nia esplika.
Aleinde ne’e, Irlanda mós hatudu apoiu ba Estadu illa ki’ik sira iha dezenvolvimentu ka Small Island Developing States (SIDS), inklui Timor-Leste hodi kontinua kooperasaun iha fórum internasionál sira hanesan Konferénsia Oseanu iha Nice, Fransa iha tinan ne’e, no klaru iha Nasaun Unida (ONU).
“Ami hanesan Estadu illa ki’ik ida no komprende dezafiu sira ne’ebé hasoru husi nasaun sira hanesan Timor-Leste. Tanba ne’e, ami sei hadi’a nafatin solidariedade no kooperasaun”, nia hateten.
Sorumutu ne’e mós marka fin husi mandatu Embaixadór Padraig Francis nian iha rejiaun ne’e no halo parte iha ninia vizita despedida ba líder sira nasaun ne’e nian.
“Irlanda iha relasaun istórika ho Timor-Leste, hahú kedas iha tempu luta ba independénsia to’o agora. Ita hakarak mantein ligasaun metin no kontaktu regulár ho Timor-Leste ba oin”, nia konklui.
Jornalista: Arminda Fonseca
Editora: Maria Auxiliadora
