DILI, 17 Juñu 2025 (TATOLI) – Prezidente Komisaun E Parlamentu Nasionál (PN), ne’ebé trata Asuntu Infraestrutura, Marcos Xavier, husu ba Ministériu Obra Públika (MOP) atu kria polítika di’ak ba reabilitasaun no alargamentu estrada iha Dili.
Nia observa katak projetu reabilitasaun no alargamentu estrada iha kapitál la’o di’ak, maibé presiza hadi’a.
“Iha Senggol ne’e uluk sira dehan loke estrada aumenta tan jalur rua, maibé agora ita halo fali jardín, tanba dezeñu no BoQ seida’uk iha, ita halo. Ne’e mak husu ba MOP tenke haree didi’ak molok atu implementa, de repente ita bá halo, laiha dezeñu no BoQ, ida-ne’e mak akontese”, nia dehan.
Deputadu husi bankada CNRT ne’e rekomenda ba MOP tenke haree didi’ak planta no kadernu enkargu (BoQ, iha inglés) hodi halo planu ne’e dala ida de’it, labele halo tiha planu ida depois ba halo fali seluk.
“Se laiha [BoQ] oinsá mak ita atu garante kualidade obra? Oinsá ita labele hatene tanba kualidade ne’e ita haree husi dezeñu no BoQ no iha terrenu halo tuir ka la’e?”, nia tenik.
Deputadu ne’e observa katak alargamentu estrada iha área Fatuhada, Kuartel Jerál F-FDTL nian la halo luan, maibé loke aumenta fali jardín iha ne’ebá.
“Estrada sira iha Dili laran dehan ita atu loke, maibé ita la loke estrada, halo fali jardín. Nune’e sujere halo konstrusaun ba estrada de’it hodi fó espasu ba movimentu transporte”, nia hato’o.
Komisaun mós identifika obra balun iha Dili laran laiha kuadru informasaun. “Ami-nia fiskalizasaun iha Dili laran balun laiha orden serbisu depois halo de’it. Ne’e labele, ita kontra lei”, nia lamenta.
Deputada FRETILIN, Lídia Norberta, mós preokupa kona-ba estrada trosu husi Kuartel Jerál F-FDTL nian iha Ministériu Planeamentu no Investimentu Estratéjiku (MPIE) nia oin sa’e bá leten halo mós jardin no estrada ne’e sai kloot tiha.
“Orgulu boot ba populasaun sira, tanba koopera hodi halo estrada ne’ebé iha, tanba Dili ne’e iha tráfiku ne’ebé boot. Maibé, infelizmente saida mak akontese? Ein vez dalan ne’e luan para halo faixa haat [tanba] antes ne’e iha faixa rua, maibé nafatin no kria tan fali jardín iha ne’ebá halo dalan kloot tan de’it”, nia preokupa.
Iha sorin seluk, deputadu KHUNTO, Luís Roberto, sujere atu halo alargamentu estrada iha Dili laran presiza iha jestaun di’ak. “Governu tenke iha planu ida atu fó limitasaun ba transporte importadu. Presiza halo mós jestaun ba ida-ne’e, la’e engarrafamentu la’o nafatin”, nia sujere.
Vise-Ministru ba Asuntu Parlamentár, Adérito Hugo, hateten MOP daudaun hala’o hela alargamentu no reabilitasaun ba estrada iha kapitál no ba bairru seluk ne’ebé kondisaun estrada ladi’ak, hanesan iha Tasi Tolu, Masilidun no seluk tan.
Jornalista: Nelson de Sousa
Editora: Maria Auxiliadora
