DILI, 17 Juñu 2025 (TATOLI)—Ministériu Komérsiu no Indústria (MCI-sigla portugeza) halo lansamentu dalan ba negósiu ho modalidade kompetisaun negósiu inovativu ba dalimak hanesan atividade ida atu apoiu ba iha mikro, pekena no média empreza sira iha Timor-Leste.
“Ohin ita halo lansamentu dalan ba negósiu ho modalidade kompetisaun negósiu inovativu ba dalimak, hanesan atividade ida atu apoiu ba iha mikro, pekena no média empreza liuliu ba empreza lokál sira-ne’ebé hala’o husi timoroan sira ho idade produtiva ho negósiu foun,” Ministru Komérsiu no Indústria, Filipus Nino Pereira, informa ba jornalsita sira, iha edifísiu Ministériu Komérsiu no Indústria, Bebora, tersa ne’e.
Nia informa, objetivu prinsipál dalan ba negósiu ne’e mak dahuluk fortifika kapitál investimentu iha mákina no ekipamentu ba empreza foun sira-ne’ebé mak eziste ona, mellora prosesu produsaun ne’ebé mak efisiente liu, kualidade no kuantidade aas atu hasa’e kompetividade merkadoria, garante sustentabilidade produsaun no komersializasaun no hasa’e joven emprendedór ne’ebé kompetente no inovativu.
Nino esplika, modalidade kompetisaun negósiu inovativu ne’ebé mak ohin hala’o ona nia lansamentu ne’e hahú loke ona inskrisaun no aplikasaun ba joven sira-ne’ebé mak iha ideia inovativa iha negósiu nian no sei taka inskrisaun iha loron 4 Jullu no iha loron 18 Jullu sei anúnsia rezultadu ba akampamentu nian.
Iha fatin hanesan, Diretór Jerál Indústria Ministériu Komérsiu no indústria, Martins Magno, hateten programa ne’e atu apoiu empreza lokál sira liuhusi kompetisaun negósiu inovativu, iha-ne’ebé sei kompete liuhusi aprezentasaun planu negósiu inovativu hodi hetan avaliasaun husi ekipa júri no sira-ne’ebé sei liu iha faze ida-ne’e mak sei hetan oportunidade atu hetan apoiu fundu mákina no ekipamentu.
“Atividade ida-ne’e tama ona iha períodu dalimak, ho tema ‘Promove diversifikasaun ekonomia ho inovasaun hodi hakbiit no garante sustentabilidade liuhusi suporta ba negósiu mikro, pekena no média empreza’. Programa ne’e ita hahú iha tinan 2021. To’o agora totál empreza benefisiáriu hamutuk 378 husi setór produtivu haat maka hanesan agrikultura, indústria, komérsiu no turizmu,” Martins Magno haktuir.
Nia afirma, Governu halo koopersaun ho parseiru UNDP ho KOICA hodi implementa projetu ne’e dezde inísiu.
Entretantu, Ministériu Komérsiu no Indústria apoiu fundu ba kompetisaun negósiu inovativu hamutuk rihun $200.
Jornalista: Felicidade Ximenes
Editór: Xisto Freitas da Piedade
