DILI, 17 Juñu 2025 (TATOLI)-Xefe Departamentu Merenda Eskolár iha Ministériu Edukasaun (ME), Belchior Maia Almeida Barros, hatete sei koordena ho Ministériu Agrikultura, Pekuária, Peska no Florestál (MAPPF) atu konserva ikan, nune’e bele hatán ba menu ikan iha programa merenda eskolár.
“Ami atu halo koordenasaun ho ministériu agrikultura liuhusi diresaun peska oinsá atu haree métodu sira ne’ebé bele haree, atu halo konservasaun ba hahán ikan tasi nian”, Belchior hatete ba TATOLI iha nia knaar fatin Vila Verde, tersa ne’e.
Nia haktuir katak kazu ikan lanu estudante hamutuk 16 iha ensinu báziku filiál Bubin, munisípiu Bobonaru seidauk iha rezultadu análiza laboratóriu.
Belchior Almeida hatutan parte relevante hasai ona amostra hodi hatene kauza husi ikan lanu ne’e.
“Husi amostra mak ita bele hatene kauza husi lanu ne’e ikan duni ou husi buat seluk, tanba ne’e ami sei hein hela rezultadu teste ba hahán ne’ebé lanu labarik sira iha EBF Nudin, suku Batugade, postu administrativu Balibó”, Belchior dehan.
Xefe departamentu ne’e relata menu fahe ona ba kada nivel munisípiu ho hahán lokál. “Menu ne’e iha tipu tolu, hanesan hahán fó forsa mak foos rai, talas, fehuk, no hahán haburas mak koto, na’an, mantolun, foremunggu, no hahan fó protesaun mak modo tahan no ai-fuan sira”.
Nia realsa momentu ida-ne’e seidauk iha pesoál nutrisaun ne’ebé destaka iha munisípiu. “Foin daudaun iha ona aprovasaun ba dekretu governu, ne’ebe ME ho MAE halo ona aprezentasaun ba konsellu ministru, dekretu ne’e ko’alia konaba hadia espasu ne’ebé iha programa merenda eskolár”, nia dehan.
“Ita mós sei halo formasaun ba kozineira sira, oinsá prepara hahán ho di’ak, tanba husi monitorizasaun, ami nota katak situasaun balun presiza duni ita-nia kozineira sira ne’e tuir formasaun tanba dalabarak kozineira sira ne’e troka hela de’it”, nia hatutan.
Totál eskola ne’ebé asesu ba merenda eskolár hamutuk 1.531, ne’e inklui ho ensinu báziku no pre-eskolár sira, eskola katólika no privadu.
Notísia relevante: MAE apela ba responsavel programa atu kontrola ikan iha merenda eskolár
Jornalista : Osória Marques
Editora : Rita Almeida
