Governu muda oráriu funsionamentu postu fronteirisu ho Indonézia
DILI, 18 Juñu 2025 (TATOLI) – Ministru Interiór, Francisco da Costa Guterres, aprezenta projetu rezolusaun Governu nian kona-ba mudansa oráriu funsionamentu postu fronteirisu ho Repúblika Indonézia no aprova ona iha Konsellu Ministru.
Nia esplika medida ne’e ho objetivu atu reforsa kooperasaun entre país rua no fasilita mobilidade iha zona fronteirisa sira, nune’e bele promove fluksu ema no merkadoria no hametin lasu sosiál, kulturál, familiár no ekonómiku entre komunidade iha sorin rua fronteira nian.
Nia subliña katak alterasaun ida-ne’e mós atu hatán ba proposta ida ne’ebé aprezenta husi Autoridade Nasionál Jestaun Fronteira Indonézia nian no tuir prinsípiu resiprosidade entre nasaun viziña sira.
Governante ne’e dehan desizaun halo mudansa ba oráriu iha fronteira sira ne’e halo depoizde enkontru ho parte Indonézia, ho Embaixadór Indonézia, Okto Dorinus Manik, no ekipa téknika sira Indonézia nian mós haruka karta, liuhusi Timor-Leste nia Kónsul.
“Depoiz ita negosia, ita presiza estende tan oras serbisu nian iha fronteira, hanesan iha Batugadé, Sakato, Oésilo ho Salele”, dehan.
Ministru esplika katak oráriu serbisu nian ne’ebé sei aplika iha fronteira haat ne’e mak hanesan ho desizaun katak iha postu fronteira Batugadé, Salele, Sakato no Oésilo sei hala’o operasaun husi tuku 09 dadeer to’o tuku 6 lokraik, ho deskansa husi tuku 1 to’o tuku 2 lokraik, aliña ho oras abertura husi postu sira Indonéziu nian iha Mota-Ain, Mota-Masin, Wini no Napan.
Governante ne’e realsa katak baibain oras serbisu iha fronteira sira hahú tuku 9 to’o de’it tuku 12, maibé agora aumenta tan oras ida para to’o tuku 13h depoiz komesa fali tuku 14h to’o tuku 18h.
“Ita estende oráriu ne’e para fasilita movimentu komunidade bá fronteira di’ak liután. Tanba dalabarak ita balun halo serbisu tama bá [Indonézia no] sai fali mai la di’ak ona tanba de’it oras ne’e badak liu. Entaun, ita estende tan oras para bele hala’o serbisu sira-ne’e iha fronteira no fasilita ita-nia komunidade bele la’o bá la’o mai di’ak”, konklui.
Jornalista: Arminda Fonseca
Editora: Maria Auxiliadora
