DILI, 18 Juñu 2025 (TATOLI)-Prezidente Tribunál Rekursu, Afonso Carmona, informa kompozisaun membru Konsellu Superiór Majistratura Judisiál (KSMJ) nian kompleta ona, nune’e daudaun funsiona normál hodi hala’o serbisu.
“Parlamentu mós deside tiha ona nia [membru] no hodikalan ha’u hetan mensajen Governu mós nomeia tiha ona nia ema. Mudansa iha Konsellu nian ne’e kompletu ona atu apoia atividade. Ha’u nu’udar Prezidente foun no Parlamentu, Prezidente Repúblika kompletu ona, ne’ebé Konsellu funsiona normál”, nia dehan ba Tatoli iha Parlamentu Nasionál, ohin.
Afonso Carmona dehan dezde asume knaar hanesan Prezidente Tribunál Rekursu, foin hala’o reuniaun Konsellu nian ba datoluk iha Suai hodi diskute asuntu promosaun ba juis no seluk tan no tuir planu konsellu sei hala’o reuniaun tuirmai iha Óekusi.
“Agora Tribunál movel hakbesik justisa ba povu, entaun Konsellu mós ba juis sira-nia serbisu fatin para motiva sira-nia espíritu serbisu nian no sira mós levanta sira-nia problema iha ne’ebaá no Konsellu bele rona kedas para iha reuniaun ne’e ita diskute buat ne’ebé ita rona pois ita deside”, realsa.
Tuir Konstituisaun Repúblika Demokrátika Timor-Leste (KRDTL) iha artigu 128 (Konsellu Superiór Majistratura Judisiál nian), ne’ebé haktuir iha alínea 1 hateten Konsellu Superiór Majistratura Judisiál nian, órgaun jestaun no dixiplina ida majistradu judisiál sira-nian, ne’ebé iha kompeténsia atu foti, hatún, muda no foti-sa’e juis sira.
Iha alínea 2 haktuir, Juís Prezidente Tribunál Supremu Justisa nian mak prezide Konsellu Superiór Majistratura Judisiál, ne’ebé halo parte vogál sira tuirmai ne’e: a) Ida, Prezidente-Repúblika mak hili, b) Ida, Parlamentu Nasionál mak foti, c) Ida, Governu mak hili, d) Ida, Majistradu Judisiál mak hili husi sira leet. Iha alínea 3 hateten, lei maka regula Konsellu Superiór Majistratura Judisiál nia kompeténsia, organizasaun no nia knaar.
Lembra katak iha 14 Maiu 2025, Parlamentu Nasionál liuhusi eleisaun sekreta iha plenária estraordinária, hili ona Silvério Pinto Baptista nu’udar membru efetivu KSMJ no Leonito Ribeiro hanesan suplente hafoin Carmelita Caetano Moniz (efetivu) no Ivo Jorge Valente (suplente) rezigna-an.
Notísia relevante: Parlamentu hili Silvério Pinto sai membru Konsellu Superiór Majistratura Judisiál
Husi Prezidente Repúblika, José Ramos Horta, mós nomeia Francisco José Ly de Sousa Assis Nicolau ba membru efetivu KSMJ no Jeremias Pereira ba membru suplente. Husi parte Governu nian mak Roberto Pacheco no Tribunál Rekursu mak Duarte Tilman.
Jornalista: Nelson de Sousa
Editora: Maria Auxiliadora
