DILI, 18 Juñu 2025 (TATOLI) – Governu halo alterasaun daruak ba Dekretu-Lei númeru 47/2023, loron 23 fulan-Agostu, ne’ebé aprova orgánika Prezidénsia Konsellu Ministru (PCM, sigla portugés) nian hodi ajusta buat balun.
Tuir dokumentu ne’ebé Tatoli asesu, proposta ne’e aprezenta husi Ministru Prezidénsia Konsellu Ministru, Agio Pereira.
“Kuaze tinan rua hafoin inísiu mandatu Governu Konstitusionál IX, presiza halo ajustamentu balun iha orgánika Prezidénsia Konsellu Ministru nian, bazeia ba esperiénsia ne’ebé hetan ona, ho objetivu atu hadi’a funsionamentu instituisaun ne’e nian”, nota ne’e hateten.
Nune’e, orgánika nia regra sira hetan adekuasaun, hodi permite katak Sekretaria Estadu Komunikasaun Sosiál bele iha autonomia, liuhusi orgánika rasik.
Aleinde ne’e, kria mós Departamentu Teknolojia no Informátika, serbisu foun ida ne’ebé molok ne’e la prevee, maibé ne’ebé hahú daudaun ona sai autónomu entre serbisu oioin ne’ebé halo parte iha Prezidénsia Konsellu Ministru.
Revizaun ida-ne’e mós uza hodi atualiza no ajusta atribuisaun sira Prezidénsia Konsellu Ministru nian, liuliu hirak ne’ebé relasiona ho atribuisaun sira husi ministériu seluk nian, nune’e bele hadi’a koordenasaun no evita knaar sira ne’ebé sobrepoin malu.
Jornalista: Arminda Fonseca
Editora: Maria Auxiliadora
