DILI, 18 Juñu 2025 (TATOLI)–Sekretáriu Estadu Formasaun Profisionál no Empregu, Rogério de Araújo Mendonça, keixa Adjuntu Komisáriu Antí Korrupsaun (CAC-sigla portugeza), Miguel Acácio Faria ba Ministériu Públika (MP) tanba akuza nia foti-subar osan Estadu.
Rogério lembra katak Adjuntu CAC Miguel Faria halo asaun ne’e bainhira hala’o vizita servisu ida bá Sekretaria Estadu Formasaun Profisionál no Empregu (SEFOPE) iha loron 12 fulan-Juñu foin lalais ne’e hodi hato’o ba diretór no funsionáriu na’in-rua husi SEFOPE iha Munisípiu Aileu katak Sekretáriu Estadu Rogério Araújo foti-subar osan Estadu.
“Ha’u hato’o ba públiku katak ha’u halo ona konsultasaun no koñesimentu ba iha ha’u-nia superiór katak hodi mai hato’o keixa hasoru señor Miguel Acácio Faria,” Rogério Araújo hateten ba jornalista sira hafoin hhao’o keixa iha Prokuradoria Jerál Repúblika, Kolmera, kuarta ne’e.
Nia haktuir, depoizde nia (Miguel) sai husi edifísiu SEFOPE Aileu, kontinua viajen hodi hasoru Diretór SEFOPE Munisípiu Aileu, Lourenço Falcão ho funsionáriu na’in-rua, naran Bendito no Alfredo hodi hameno hela ba sira atu hato’o kumprimentu (liafuan síniku) ba ema na’in-rua hanesan Sekretáriu Estadu Rogério no Prezidente Administrasaun Munisípiu Aileu, João Bosco dos Santos.
Sekretáriu Estadu konsidera katak ida-ne’e nu’udár ameasa no persegisaun ida ba nia hanesan membru Governu.
“Ha’u-nia kompriensaun mak ida-ne’e, CAC seidauk notifika ha’u ida ka seidauk fó karta ida mai ha’u hodi presta deklarasaun. Más, Miguel bele ba hateten dehan ha’u na’ok osan Estadu ne’e halo nusa,” nia haktuir.
Rogério tenik, Miguel hanesan adjuntu, maibé la’ós ema ne’ebé mak selesaun pur méritu, signifika nomeasaun pur konfiansa. Bele dehan serbisu sira-ne’ebé mak tékniku, delega bá Diretór Jerál, Diretór Nasionál no Xefe Departamentu mak halo funsaun sira-ne’e.
Tanba ne’e, governante ne’e husu ba Komisáriu CAC atubele suspende ema ida hanesan Miguel Acácio Faria hodi loke investigasaun iha Ministériu públiku no kontinua lori bá iha Tribunál.
Entretantu, Adjuntu CAC, Miguel Acácio Faria, hateten nia halo duni vizita servisu ida bá SEFOPE Aileu hodi haree ezekusaun orsamentu tanba SEFOPE Aileu mós hetan apoiu osan husi Gabinete Sosiedade Sivíl, tanba ne’e CAC iha obrigasaun halo ida-ne’e.
Nia rejeita halo ameasa no persegisaun ba Sekretáriu Estadu SEFOPE, Rogério Araújo Mendonça.
Nia dehan, Sekretáriu Estadu Rogério Araújo Mendonça mak ameasa nia bainhira hala’o ninia kna’ar.
“Nia ameasa ha’u husi telefone no ha’u horisehik hato’o ona keixa hasoru nia iha PCIC ho Nuc 0291/25.PCIC ho krime obstrusaun autoridade ne’ebé previstu iha artigu 243 husi Kódigu Penál Timor-Leste,” nia afirma.
Jornalista: Natalino Costa
Editór: Xisto Freitas da Piedade
