DILI, 18 Juñu 2025 (TATOLI)–Ekipa konjunta kompostu husi Komisaun Antí Korrupsaun (CAC-sigla portugeza), ekipa Investigadór Unidade Informasaun Seguransa (UIS) ho Diresaun Investigasaun Kriminál Polísia Nasionál Timor-Leste (PNTL), kuarta ne’e, buska Diretór Progama Nasionál Dezenvolvimentu Suku (PNDS) ho inisiál ES.
Buska domisiliária no apreensaun ne’e ekipa konjunta ezekuta mandadu judisiál husi Tribunál Judisiál Primeira Instánsia Baucau ho NUC. 0005/25.CACTL, no hala’o iha edifísiu Administrasaun Munisípiu Manatutu.
Diretór PNDS Munisípiu Manatutu ne’e suspeitadu ba prosesu utilizasaun orsamentu PNDS la tuir regra orsamentál ne’ebé la’o iha Munisípiu Manatutu.
“Orden bá halo buska ne’e konsede iha auto-inkéritu nian ne’ebé investiga daudaun hela suspeitu,” sita komunikadu imprensa husi ekipa konjunta ne’ebé TATOLI asesu. kuarta ne’e.
Iha prosesu buska no apreensaun ne’e, ekipa konjunta asegura sasán no dokumentu barak. Ekipa konjunta sei bá suspeitu nia uma atu rekolla tan dokumentu balun no identifika suspeitu nia kareta privada.
Agora daudaun, ekipa konjunta lori ona diretór ne’e mai Dili hodi submete ba prosesu identifikasaun iha CAC.
Jornalista: Natalino Costa
Editór: Xisto Freitas da Piedade
