DILI, 19 Juñu 2025 (TATOLI) – Arsebispu Metropolitana Arkiodioseze Dili, Dom. Virgílio Cardeal do Carmo da Silva, husu sarani sira konsagra Jesus nia futar isin no raan iha misa selebrasaun loron solenidade santíssimo corpo e sangue de cristo.
Aleinde misa sarani sira mós halo prosesaun hahú husi igreja parókia Balide to’o Nain-Feto Largo, Lesidere.
Durante prosesaun sarani sira hasa’e orasaun no hananu hamutuk ho espresaun ne’ebe alegria no la sente kolen no malirin bainhira la’o ain iha udan nia laran.
Arsebispu iha nia omília katak, bainhira ko’alia kona-ba ai-han de’it ba paun ne’ebé bele habosu ita-nia kabun. Buat hotu ne’ebe isin ne’e presiza sai ida de’it no paun ne’ebé boot liu hotu maka domin.
“Jesus mak miligre tanba nia kaer paun fuan lima, ikan rua nakfila ba hitu, katak ida-ne’e reprezenta ba hahan hotu ne’ebé bele fó haan ema rihun lima-resin hodi rekoñese katak buat hotu mai husi nai Maromak,” Arsebispu ne’e informa iha omília misa solenidade corpo e sangue de cristo ne’e.
Nune’e selebrasaun loron ida-ne’e atu hanoin kona-ba eukarístia tanba Jesus molok husik hela nia mai, ita sinál boot ida iha ninia istória liuhusi paun ne’ebé iha ita-nia oin katak “ne’e ha’u-nia isin, ha’u buka atu sai paun hodi fó han ema hotu.”
“Imi ne’ebé halo prosesaun la’ós de’it fiar maibé buka oinsá atu sai pesoa eukarístia tanba eukarístia mak sai sinteze ba Jesus nia ezisténsia tomak”, líder igreja katólika timor ne’e esplika.
Entretantu iha selebrasaun loron solenidade santíssimo corpo e sangue de cristo, sarani sira la’ós de’it halo prosesaun maibé antes ne’e sira konvoka missa hamutuk iha igreja parókia Balide.
Jornalista: Alexandra da Costa
Editór: Evaristo Soares Martins
