PITL realiza formasaun inkluzaun sosiál ba jornalista sira
DILI, 19 Juñu 2025 (TATOLI) – Organizasaun naun-governamentál Plan International Timor-Leste (PITL, sigla inglés) servisu hamutuk ho Asosiasaun Halibur Matan Defisiénsia Timor-Leste (AHMDTL) no Arkuiris Timor-Leste fó formasaun ba jornalista na’in-23 husi plataforma mídia komunikasaun sira kona-ba utilizasaun termu inkluzaun sosiál bainhira públika notísia iha mídia.
Fasilitadór ba programa inkluzaun sosiál PITL, Egas de Sousa, esplika, objetivu husi formasaunn ida-ne’e mak atu promove padraun direitu umanu internasionál relasiona ho asuntu inkluzaun nian ba jornalista sira hodi hakerek informasaun tuir terminolojia ne’ebé loos.
“Entaun liuhusi formasaun ne’e fasilita ita-nia jornalista sira, tanba sira mak sai ponte informasaun ba públiku, nune’e sira tenke hakerek tuir terminolojia ba kategória tipu defisiénsia, atu labele mosu deskriminasaun,” fasilitadór ne’e informa ba jornalista sira salaun ALFELA, Vila Verde, kinta.
Tanba ne’e durante formasaun matéria espesífiku ne’ebé sei aprezenta mak kona-ba asuntu ema ho defisiénsia (EhD) no ema ho diversidade (LGBTIQ+). Aleinde ne’e partisipante sira mós la’ós simu de’it matéria maibé iha mós prátika hanesan hakerek notísia kona-ba asuntu inkluzaun sosiál.
Jornalista husi mídia independente, Rofina Borges, hateten, formasaun ne’e sai hanesan oportunidade ida ba jornalista sira hodi aumenta tán koñesimentu kle’an kona-ba termu inkluzasaun sosiál nian bainhira kobertura asuntu referidu.
“Bainhira ita hatene ona termu husi asuntu inkluzaun sosiál nian, ajuda ona ita hakerek notísia tuir termu linguajen ne’ebé mak loos atu labele halo deskriminasaun ba ema ida nia direitu,” partisipante ne’e hateten.
Tanba ne’e inisiativa husi Plan International ne’e di’ak tebes, alende sensibiliza ba jornalista sira maibé Plan Internasional mós tenke kontinua sensibiliza termu inkluzaun sosiál ba sosiedade sira seluk hodi komprende bainhira prátika iha sira-nia moris loron-loron.
“Espera durante loron rua, ha’u no kolega sira seluk bele hetan netik esperiénsia maske uitoan maibé ida-ne’e reforsa ona servisu jornalista nian bainhira halo obra relasiona ho asuntu ne’e,” nia garante.
Atividase formasaun ne’e realiza durante loron rua, hahú husi loron 19 to’o 23 fulan Juñu no partisipa husi ajente mídia eletrónika, mídia imprime no mídia online sira.
Jornalista: Alexandra da Costa
Editora: Evaristo Soares Martins
