PNTL halo identifikasaun ema na’in-ualu ne’ebé envolve grupu foti subar telefone

DILI, 19 Juñu 2025 ,(TATOLI) – Polisia Nasionàl Timor- Leste Eskudra Dom Aleixo halo identifikasaun ba suspeitu na’in-ualu ne’ebé  hola parte iha atividade foti subar telefone.

Suspeitu na’in-ualu ne’e iha tersa (17/6) sira halo operasaun kordenada hodi ba foti subar ema nia telefone iha Dili laran.

Nune’e iha tersa kalan ne’e polísia eskudra Dom Aleixo asegura suspeitu na’in-tolu uluk hafoin sira foti subar telefone iha loja ida iha área Fatuhada.

Bazea ba informasaun ne’ebé suspeitu na’in-tolu ne’e nia informasaun katak sira hamutuk na’in-sia mak hamutuk halo atividade foti subar telefone.

Nune’e iha kuarta horisehik, Komandante Eskudra Dom Aleixo, Inspetór Xefe Polísia Domingos Pinto, lidera ekipa eskuadra Dom Aleixo tun direta ba suspeitu na’in-lima ne’e nia hela fatin ne’ebé lokaliza iha area Hudi-Laran, Suku Bairru-Pite, Postu Administrativu Dom Aleixo, Munisípiu Dili.

Husi suspeitu na’in-sia ne’e, só iha suspeitu ida mak polísia ladauk asegura tanba momentu polísia ba foti, molok polísia atu ba nia uma, suspeitu referida halai subar-an husi polísia.

Nune’e polísia tula suspeitu na’in-ualu ne’e iha karreta laran inklui sasin balun tán tanba tuir informasaun ne’ebé suspeitu sira hato’o ba polísia katak telefone ne’ebé sira foti balun fa’an ona ba sasin sira-ne’e.

Hafoin Komandu Eskudra Dom Aleixo halo tiha identifkasaun12 oras de tempu tuir Kódigu Prosesu Penál artigu 52 haruka, suspeitu na’in-ualu mak polísia eskudra Dom Aleixo detein ona iha sela detensaun.

“Ba kazu ne’e iha suspeitu na’in sia. Maibé ita halo de’it identifikasaun ba suspeitu na’in-ualu no na’in ida sei buka tuir. Ita konklui ona dentifkasaun ba suspeitu na’in ualu ne’e ita rejista kazu ne’e ho NUC 0413/25.DICMR, ita prepra autos hotu ona hein atu lori ba Ministériu Públiku”, nota imprensa ne’ebé Tatoli asesu kinta ne’e.

Husi nota imprensa ne’e sita katak suspeitu sira-ne’e agora daudaun detein ona iha sela eskudra Dom Aleixo.

TATOLI