DILI, 20 Juñu 2025 (TATOLI)—Ró Kruzeiru Paspaley Pearl Majuro hosi Austrália tula turista hamutuk 18 hosi nasaun oinoin atraka ona iha Portu Dili, sesta ne’e.
“Ró kruzeiru ne’e to’o Timor iha horisehik (19/06) lorokraik iha tuku 17:00 Otl no ohin atraka iha Portu Dili iha tuku 08:35 Otl. Tula turista sira hamutuk ema na’in-18 husi nasaun sira hanesan Filipina, Bulgária, Roménia, Uruguai no Ukránia,” Xefe Ajénsia ANL Timor, Emigio Esteves, ba jornalista sira iha Portu Dili.
Nia dehan, turista hirak-ne’e aleinde vizita fatin turístiku sira iha Dili, sei vizita mós Illa Ataúru no Jaco no sira sei hela iha Timor durante fulan ida (loron 32 nia laran).
Iha fatin hanesan, Diretór Jerál Turizmu, António da Silva hateten turista sira-ne’e hala’o vizita ba fatin turístiku Timor-Leste nian.
“Turista sira hakarak esplora ita-nia destinu turístiku sira. Viajen sira-ne’e ajénsia viajen mak jere,” António esplika.
Nia hateten katak turista sira sempre vizita fatin turístiku sira iha Timor iha kada tinan, iha-ne’ebé balun estadia oras balun, balun semana no fulan.
Diretór jerál ne’e konsidera, vizita turista sira-nian kontribui reseita ba Estadu, tanba turista sira-ne’e vizita fatin turizmu sira, ezemplu iha Dili sei bá vizita Muzeu Rezisténsia, Semitériu Santa-Krúz, Tais Market, Kristu-Rei no fatin seluk tan.
Jornalista: Felicidade Ximenes
Editór: Xisto Freitas da Piedade
