VIKEKE, 20 Juñu 2025 (TATOLI)—Sekretáriu Estadu Formasaun Profesionál Empregu (SEFOPE), sesta ne’e, realiza feira karreira no edukasaun ba estudante finalista sira iha munisípiu Vikeke ho tema “Feira karreira no edukasaun”, atu nune’e estudante sira bele deside sira-nia futuru.
Reprezentante SEFOPE atuál diretór Jerál SEFOPE, Carlito Rosário Cabral, hateten atividade ne’e ho objetivu atu atinje futuru brillante liuhusi asesu ba informasaun karreira, rede profisionál, formasaun vikasionál, edukasaun no programa servisu iha rai-laran no rai-li’ur.
“Feira karreira no edukasaun ida-ne’e ita fahe informasaun ba ita-nia estudante no finalista sira bele hatene deside sira-nia futuru. Tanba, ita hatene kada tinan estudante sira finaliza sira-nia estudu sekundáriu la ba kontinuasaun iha universidade ho razaun oioin, balun laiha finanseiru hodi kontinua sira-nia estudu no balun finanseiru iha maibé labele kontinua tanba koñesementu ladun hodi kontinua iha nivél ensinu superior,” Carlito Rosário Cabral hateten ba Agência Tatoli, iha abertura feira karreira no edukasaun iha resintu administrasaun Vikeke.
Tanba ne’e, nia dehan, SEFOPE realiza feira karreira edukasaun ba estudante sira hodi hatudu dalan ba estudante sira, depois estudante sira akaba sira-nia estudu iha nivél sekundáriu.
“Estudantu balun hanoin sira la kontinua ba nivél universitáriu, laiha ona dalan sira atu hetan servisu ruma. Maibé iha dalan seluk ba ita-nia estudante sira mak formasaun sira-ne’ebé SEFOPE loke, karik estudante sira la konsege kontinua estudu iha nivel superior,” nia hateten.
Ho nune’e, SEFOPE lori programa sira-ne’e hodi hakbesik ba joven sira iha postu no munisípiu sira hodi hetan informasaun, nune’e bele diside sira-nia aan ba sira-nia futuru.
Prezidente Autoridade Munisípiu Vikeke, Francisco C. S de Gonzaga Soares, hateten programa feira karreira no edukasaun ida-ne’e sai hanesan oportunidade di’ak ba estudante iha munisípiu Vikeke.
“Ha’u sente programa ida-ne’e sai importante ba ita-nia estudante sira. Tan ne’e, ha’u husu ba estudante sira iha munisípiu Vikeke tenke aproveita feira ida-ne’e hodi bele hatene programa sira-ne’ebé iha SEFOPE hanesan formasaun sira ba rai-li’ur no ria-laran,” nia hateten.
Programa feria karreira no edukasaun ne’ebé SEFOPE organiza durante loron rua 92) nia laran ne’ e gasta orsamentu hamutuk $6,090.
Abertura feira karreira no edukasaun ne’e partisipa husi autoridade lokál, komandante Polísia Nasionál Timor Leste (PNTL) munisípiu Vikeke, ekipa SEFOPE nasionál no estudante sekundáriu na’in-520 no ezivitór hamutuk 24.
Jornalista : Vitorino Lopes da Costa
Editór : Cancio Ximenes
