Sidadaun estranjeira ne’ebé hala’o tratamentu saúde iha HNGV selu

DILI, 18 Juñu 2025 (TATOLI)—Diretór Servisu Apoiu Diagnóstiku no Terapéutiku iha HNGV, Vidal de Jesus Lopes, hateten sidadaun estranjeira banhira  hala’o tratamentu saúde iha Hospital Nacional Guido Valadares (HNGV) tenke selu tuir moras ne’ebé iha.

“Estranjeiru ida mak mai halo tratamentu iha Hospital Nacional Guido Valadares, tenke selu, tantu husi Komunidade Nasaun Ko’alia Lian Portugés (CPLP-sigla portugeza) ne’ebé  mai no sidadaun estranjeira seluk tenke selu tuir moras ne’ebé mak iha,” Vidal de Jesus informa iha nia kna’ar fatin, HNGV, Bidau, kuarta ne’e.

Nia esplika, fulan-Jullu tinan ne’e, sei hala’o jogu CPLP iha Timor, tanba ne’e  sidadaun estranjeira mak monu ka moras ruma halo tratamentu iha HNGV tenke selu.

“Atividade jogu CPLP tantu Governu mak organiza mós  ekipa komisaun seidauk iha desizaun ruma. Husi nivel altu despaxu husi Konselu Ministru katak tenke fó livre ba estranjeiru atu tratamentu hala’o gratuitu, ida-ne’e ita ezekuta, maibé karta ruma seidauk to’o iha ami-nia liman. Ami sei aplika nafatin regulamentu anteriór ne’ebé vigoór hela ne’e. Ita aplika ida-ne’e katak nafatin selu tuir moras ne’ebé mak sira iha,” nia haktuir.

Antes ne’e, Koordenadór Nasionál ba Jogu CPLP husi  Ministériu Saúde, Simplício Amaral, hateten Ministériu Saúde identifika ona fatin sira-ne’ebé mak atu estabelese postu saúde ba iha jogu CPLP ne’e hamutuk hitu.

“Ministériu Saúde identifika ona fatin hitu mak hanesan Jináziu Dili (GMT), Estádiu Munisipál Dili, Kampu Kulau Bekora, fatin jogu tenis besik UNTL no sira seluk ne’ebe iha, tanba Ministériu Saúde mós monta ona  nia postu médiku ho profisionál saúde sira,” Simplício esplika.

Nia hatutan katak kona-ba profisionál saúde ne’e la’ós Ministériu Saúde de’it, maibé sira sei halo pedidu ba Kruúz Vermella Timor-Leste atu bele apoiu.

“Iha-ne’e ita prevee ba pesoál saúde sira hamutuk na’in-150 mak sei halo atendimentu,” nia konklui.

Jornalista: Felicidade Ximenes

Editór: Xisto Freitas da Piedade