MALÁZIA, 19 Juñu 2025 (TATOLI) – Universidade privadu ho koñesidu iha Malázia, Taylor’s University, kria programa ho naran ‘Prezidente Ramos Horta skolarship’ nune’e bele oferese bolsa estudu ba timoroan sira.
Taylor’s University maka universidade privada ida iha Subang Jaya, Selangor, Malázia. Taylor’s University nu’udar universidade privada di’akliu iha Malázia, bazeia ba QS World University Rankings. Universidade ne’e harii iha tinan 1969 hanesan fakuldade ida, hetan estatutu koléjiu universitáriu iha tinan 2006 no estatutu universitáriu iha tinan 2010.
“Sira kria bolsa estudu, programa ida bolu Prezidente Ramos Horta Scholarship, ne’e sira mak kria, sira mak fó naran espesiál ba estudante sira husi Timor-Leste,” Ramos Horta hateten ba jornalista sira iha Malázia, kinta ne’e.
Tanba ne’e, iha tempu besik Tailor’s University sei haree kria kritéria no loke programa ne’e ba timoroan sira atu hasai kursu iha lisensiatura no mestradu.
“Universidade mak sei haree hotu hodi fó kritéria nune’e fó bolsa estudu ba timoroan sira. Ha’u ko’alia ona ho Governu atu Malázia bele oferese bolsu estudu barak liu ba timoroan sira, ita haree estudante timoroan iha Malázia uitoan liu,” nia katak.
Iha okaziaun ne’e, Prezidente Repúblika, José Ramos Horta mós hetan kondekorasaun doutoramentu onoráriu kauza husi Universidade Taylor, Malázia iha loron-kinta, 19 fulan-juñu 2025.
“Sira fó mai ha’u títulu ida hanesan profesór ba Taylor’s University no Profesór iha eskola ne’e,” Prezidente Repúblika José Ramos Horta, hateten.
Xefe Estadu bá Malázia tanba hetan konvite husi Taylor’s University, universiade ne’e prestijiu boot iha-ne’e.
“Universidade ne’e mós iha ranking mundiál, sira-nia estudante rihun-22, sira rasik mak lakohi aumenta maibé mantein kualidade, universidade privadu ne’e 50% estudante ema estranjeiru,” nia informa.
“Sira konvida ha’u atu sai sira-nia profesór, la signifika ha’u tenke mai beibeik iha-ne’e, maibé ha’u iha tempu bele kombina ho sira atu mai halo palestra ruma ba sira.”
Xefe Estadu ko’alia ona ho Governu Timor-Leste nune’e selesiona timoroan sira-ne’ebé matenek atu hala’o estudu iha Malázia.
Programa ne’ebé patrosina husi Universidade Taylor sei fó apoiu kompreensivu inklui formasaun ba lian inglés, aklimatizasaun kulturál, vizita ba estudu feriadu, no preparasaun profesór sira atu garante katak estudante timoroan sira kumpre padraun profisiénsia ne’ebé presiza ba integrasaun susesu iha sistema edukasionál rejionál sira.
Inisiativa ida-ne’e reprezenta pasu signifikativu ba Timor-Leste nia integrasaun kompletu liu iha Asosiasaun Nasaun Sudeste Aziátiku (ASEAN), tuir modelu susesu ne’ebé antes ne’e implementa ona ba estudante xinés sira ne’ebé buka admisaun iha instituisaun prestijiadu sira hanesan Universidade Nasionál Singapura no Universidade Teknolojia Nanyang.
Programa ne’e hatudu Timor-Leste nia kompromisu ba avansu edukasionál no kooperasaun rejionál bainhira nasaun kontinua harii ligasaun sira iha komunidade Sudeste Aziátiku nia laran.
Jornalista: Hortencio Sanchez
Editór: Evaristo Soares Martins
