DILI, 20 Juñu 2025 (TATOLI)—Tribunál Judisiál Primeira Instánsia Dili T(JID) liuhusi Juiza Julmiati Freitas, sesta ne’e, la konsege lee desizaun ba kazu eis-Ministru Komérsiu, Indústria no Ambiente, António da Conceição “Kalohan” liga ho apoiu osan subvensaun ba grupu benefisiáriu Loja do Povo iha Aileu, Ainaru, Manufahi no Kovalima iha tinan 2014.
Razaun Tribunál halo adiamentu ba leitura akordaun ba kazu ne’e, tanba hafoin Tribunál halo verifikasaun tiha ba produsaun prova sira-ne’ebé durante ne’e aprezenta iha julgamentu, Tribunál haree katak iha tan faktu foun haat.
Faktu haat ne’e, maihusi depoimentu sasin sira hanesan grupu KAR La’o Ainaru, ne’ebé iha nia depoimentu aprezenta bá Tribunál faktu foun tolu, enkuantu sasin husi grupu kooperativa husi Maukatar (Kovalima) iha nia depoimentu aprezenta faktu foun ida ba Tribunál. Ho faktu foun sira-ne’e, Tribunál konsidera nu’udár faktu la substansiál tanba molok ne’e la konsta iha akuzasaun.
Tribunál atu konsidera faktu la substansiál sira-ne’e mak Tribunál presiza halo alterasaun hodi kosta fali iha akuzasaun nune’e bele konsidera iha desizaun Tribunál nian.
Nune’e, Tribunál uza artigu 273 husi Kódigu Prosesu Penál ne’ebe hateten katak kuandu iha produsaun prova nia laran mosu faktu ne’ebé la tama iha akuzasaun maibé iha interese ba desizaun no la hasa’e pena aplikavel nia limite másimu, ofisiozamente ka tuir rekerimentu, tribunál fó-hatene ba Ministériu Públiku no defensór, no, kuandu sira ruma husu, fó ho prazu ba sira atu prepara sira-nia pozisaun prosesuál.
Ho ida-ne’e mak Tribunál molok halo alterasaun ba faktu ne’ebé la substansiál iha akuzasaun hodi konsidera iha desizaun, Tribunál fó prazu loron 10 ba Ministériu Públiku no parte defeza sira atu hato’o posizaun hodi aseita ka lae kona-ba faktu foun haat ne’ebé Tribunál hetan ba kazu ida-ne’e.
“Ho nune’e mak Tribunál deside halo tan adiamentu ba leitura akordaun,” Juiza Julmiati Freitas deklara iha sala julgamentu TJPID, Kaikoli.
Hafoin halo tiha deklarasaun referida, Tribunál halo adiamentu ba kazu ne’e bá fali loron 30 Juñu tuku 10:00 Otl hodi lee leitura akordaun.
Jornalista: Natalino Costa
Editór: Xisto Freitas da Piedade
