DILI, 21 Juñu 2025 (TATOLI)– Harry Suryadi, jornalista senior husi Indonézia no formadór iha workshop Enhancing Climate Reporting in Timor-Leste, ne’ebé organiza husi Asosiasaun Jornalista Timor Lorosa’e (AJTL) nebee iha kolaborasaun ho UNESCO rekoñese momentu aprende nunka hotu ba ema, liu-liu ba jornalista sira.
Objetivu husi workshop ne’e maka aumenta kapasidade hosi jornalista sira hodi halo kobertura ba asuntu sira alterasaun klimátiku nian iha Timor-Leste, nasaun ida ne’ebé, maski nia kontribuisaun ki’ik ba emisaun sira karbonu nian, hetan impaktu maka’as hosi krizi klimátiku mundiál.
Iha sesaun treinamentu, Harry fahe nia aprosimasaun hanoin krítiku ho partisipante sira. Nia rekoñese katak ninia métodu hanorin nian dala ruma susar.
“Ema barak mak sente intimidadu, Ha’u hakarak fahe de’it buat ne’ebé ha’u hatene. Aprendizajen nunka hotu, inklui ba jornalista sira,” Harry Suryadi hatete hafoin taka workshop durante loron rua, ne’ebé hala’o hodi komemora Loron Mundiál Ambiente nian, nebee hetan partisipasaun husi jornalista na’in 19 husi mídia oioin, hanesan imprensa, online, rádiu, no televizaun iha Edifísiu HAK, Farol, sabádu ne’e.
Sekretáriu Jerál AJTL, Joaquim de Fatima Coutinho, hato’o agradesimentu ba parte hotu ne’ebé partisipa ona iha atividade ne’e no hein katak sei iha rezultadu ne’ebé di’ak liu tan.
“Ba Senhor Harry, obrigado wain. Espera katak ba oin ita bele kontinua servisu hamutuk fila fali. No ba jornalista sira, ami hein katak formasaun ida ne’e sei sai provizaun ida ba kobertura asuntu mudansa klimatika husi plataforma oin-oin. Ita mos hein katak kooperasaun ho UNESCO sei la para iha ne’e deit,” nia hateten.
Jornalista Domingos Moreira Soares husi GARDAMOR TV, konsidera workshop ne’e diak tebes no hein katak atividade hanesan sei kontinua iha futuru.
“Ami aprende buat barak durante loron rua ne’e. Husi komprensaun báziku ida kona-ba alterasaun klimátika, to’o oinsá hakerek ho deskritivu liu no ho detalle. Ida-ne’e ajuda duni ami iha hala’o ami nia knaar sira hanesan jornalista sira”, nia hatete.
Hafoin Workshop jornalista na’in 19 sei kontinua prepara planu kobertura konjunta relasiona ho mudansa klimátika no sei simu apoiu finansiamentu husi UNESCO no iha tempu to’o fulan tolu atu kompleta sira ida-idak nia kobertura.
Liuhusi workshop ne’e, AJTL no UNESCO subliña importánsia atu kontinua dezenvolve jornalizmu ambientál iha Timor-Leste. Etapa inisiál ida atu asegura katak kestaun klimátika sira iha fatin importante iha kobertura mídia lokál.
Jornalista : Cidalia Fátima
Editora : Armandina Moniz
